పొలంలో పోయిన ఆ చెవి రింగు 20 ఏళ్ల తర్వాత.. మళ్లీ అక్కడే దొరికింది

ఎక్కడ పోగొట్టుకున్నారో అక్కడే మళ్లీ వెతకాలని అంటారు పెద్దలు. ఇది నానుడి గురించి చెప్పినా.. ఒక్కోసారి నిజమవుతూ ఉంటాయి. ఓ వృద్ధురాలు ఎక్కడైతే తన బంగారు చెవి దిద్దులను పోగొట్టుకుందో.. మళ్లీ అక్కడే వాటిని సంపాదించింది. వెంటనే కాదండోయ్.. అవి పోయిన 20 ఏళ్ల తర్వాత. అన్నేళ్లయినా.. అవి మట్టిలో కలవకుండా.. ఎవరికీ చిక్కకుండా.. ఆమె కోసమే ఎదురుచూస్తున్నట్లుగా.. అవి అక్కడే భద్రంగా ఉన్నాయి.

Also Read: వామ్మో.. సింహం మలానికి ఇంత గిరాకీయా? ఎందుకు కొంటున్నారంటే..

ఈ అరుదైన ఘటన కేరళాలో చోటుచేసుకుంది. కసరగాడ్‌ జిల్లా బెదడ్కాకు చెందిన నారాయణి అనే వృద్ధురాలు 20 ఏళ్ల కిందట పొలం పనులు చేస్తూ బంగారు చెవి దిద్దులను పోగొట్టుకుంది. ఆ పరిసరాల్లో ఆమె ఎంత గాలించినా ఆ చెవిదిద్దులు లభించలేదు. దీంతో ఆమె వాటిపై ఆశలు వదిలేసుకుంది. ఇటీవల రూరల్ ఎంప్లాయ్‌మెంట్ గ్యారంటీ యాక్ట్ (MGNREGA) స్కీం కింద అక్కడ పనులు చేయడానికి వచ్చిన మహిళలకు ఆ చెవి దిద్దులు దొరికాయి.

Also Read: విమానాశ్రయాన్ని దున్నేస్తున్న రైతన్న.. రూ.కోట్లు కాదని అక్కడే తిష్ట!

బురదలో ఏదో మెరుస్తున్నట్లుగా కనిపించడంతో మహిళలు దాన్ని బయటకు తీశారు. వెంటనే నారాయణికి దాన్ని చూపించారు. దీంతో నారాయణి చెవి రింగు తనదేనని 20 ఏళ్ల కిందట పోగొట్టుకున్నానని తెలిపింది. సుమారు 60 ఏళ్ల కిందట 24 కిలోల బియ్యం అమ్మి ఆ చెవి దిద్దులను కొన్నానని నారాయణి ఈ సందర్భంగా తెలిపింది. నారాయణి ఆ చెవి దిద్దులను పోగొట్టుకొనే సమయంలో.. వాటి విలువ రూ.4 వేలు ఉండేది. ఇప్పుడు రూ.40 వేలు వరకు లభించే అవకాశం ఉంది. ఏది ఏమైనా ఈ వృద్ధురాలు భలే లక్కీ కదా!!