శభాష్ మహేష్.. తండ్రిలేని 271 మంది అమ్మాయిలకు పెళ్లి, ఇప్పటికి 3,172

తండ్రిలేని అమ్మాయిలకు పెళ్లి కావడమంటే అంటే సాధారణ విషయం కాదు. ఆర్థిక ఇబ్బందుల వల్ల వారు ఎన్నో ఇబ్బందులను ఎదుర్కొంటారు. ఈ నేపథ్యంలో గుజరాత్‌కు చెందిన ప్రముఖ వజ్రాల వ్యాపారి మహేష్ సవానీ తండ్రిలేక ఇబ్బందులు ఎదుర్కొంటున్న అమ్మాయిలకు పెళ్లి చేసే బాధ్యతను తన భుజాలను ఎత్తుకున్నారు. ఒకేసారి 271 మంది అమ్మాయిలకు పెళ్లి చేశారు.

సూరత్‌లో నిర్వహించిన ఈ సామూహిక వివాహాల్లో ముస్లిం అమ్మాయిల నుంచి నేపాల్ అమ్మాయిల వరకు.. ప్రతి ఒక్కరూ తమకు నచ్చిన వరుడిని పెళ్లి చేసుకున్నారు. మహేష్ గత ఎనిమిదేళ్లుగా ఇలాంటి సామూహిక వివాహాలను నిర్వహిస్తున్నారు. కన్యాదానం చేయడం దైవ కార్యమని, అమ్మాయిలకు పెళ్లిల్లు చేస్తే దేవుడి ఆశీర్వాదాలు లభిస్తాయని మహేష్ నమ్ముతారు. 2010లో మొదలుపెట్టిన ఈ కార్యక్రమాన్ని ఇప్పటికీ ఆయన నిర్విరామంగా కొనసాగిస్తున్నారు. మొదట్లో 20 నుంచి 30 మంది అమ్మాయిలు మాత్రమే ఈ వేదిక ద్వారా పెళ్లి చేసేవారు. ఇటీవల సంఖ్య గణనీయంగా పెరిగింది.

Also Read: స్నేక్ రెస్టారెంట్.. ఇక్కడ పాములను ఎలా వండి వడ్డిస్తున్నారో చూడండి!

‘‘ఈ కార్యక్రమాన్ని ప్రారంభించిన తర్వాత.. సూరత్‌లో తండ్రి లేక సమస్యలు ఎదుర్కొంటున్న అమ్మాయిలను మమ్మల్ని సంప్రదించాలని కోరాం. దీంతో ఏటేటా ఈ సంఖ్య పెరుగుతూ వస్తోంది. దీన్ని ఒక సామాజిక బాధ్యతగా తీసుకుని ఈ వివాహాలు చేస్తున్నాను. ఆర్థిక స్తోమత కలిగి ఉండటం వల్ల ఈ పెళ్లిల్లు చేయగలుగుతున్నాను’’ అని తెలిపారు. మహేష్ ఇప్పటివరకు 3,172 మంది అమ్మాయిలకు పెళ్లి చేశారు. మున్ముందు కూడా ఆయన ఈ మంచి పనిని కొనసాగిస్తానని వెల్లడించారు.

Also Read: అక్కడ ఆప్తులు చనిపోతే చేతి వేళ్లు కత్తిరించుకుంటారు, ఆవు రక్తం తాగుతారు!