ప్రాణం పోస్తున్న 76 ఏళ్ల పెద్దాయన.. ఆటోను అంబులెన్సుగా మార్చి ఉచిత సేవలు

తోటి వ్యక్తి ఆపదలో ఉంటే కాపాడటం మానేసి.. వీడియోలు, సెల్ఫీలు తీసుకుంటున్న రోజులివి. అయితే, ఈ పెద్దాయన అందిస్తున్న సేవలు చూస్తే.. ఈ భూమిపై ఇంకా మానవత్వం బతికే ఉందనే ధైర్యం కలుగుతుంది. ఢిల్లీకి చెందిన హర్జిందర్ సింగ్.. 76 ఏళ్ల వయస్సులో ఆటో నడుపుతూ ఉపాధి పొందుతున్నారు. అత్యవసర సమయాల్లో ఆ ఆటోనే అంబులెన్సుగా మారుస్తున్నారు.

రోడ్డుపై ఎవరైనా ప్రమాదానికి గురైతే వెంటనే ప్రథమ చికిత్స చేసి హాస్పిటల్‌కు తరలిస్తున్నారు. ఈ సేవలు అందించేందుకు ఆయన ఆటోలో ప్రత్యేకంగా ఫస్ట్ ఎయిడ్ కిట్ కూడా అందుబాటులో ఉంటుంది. ఎలాంటి స్వార్థం లేకుండా ఉచితంగానే ఆయన సేవలు అందిస్తుండటం గమనార్హం. ఈ సందర్భంగా హర్జిందర్ మాట్లాడుతూ.. ‘‘నేను వెళ్లే మార్గంలో ఏదైనా ప్రమాదంలో గాయపడినట్లు కనిపిస్తే వెంటనే వారిని హాస్పిటల్‌కు తరలిస్తున్నాను. దాని వల్ల అతడు ప్రాణాలు నిలుస్తాయి. రోజుకు సరాసరి ఒక బాధితుడికి సాయం చేస్తున్నా’’ అని తెలిపారు.