Pulwama Terror Attack: పాక్ నటులు, కళాకారులపై బ్యాన్.. భారత సినీ పరిశ్రమ కీలక నిర్ణయం

భారతీయ చిత్రాల్లో ఇకపై పాకిస్థాన్ నటులు, కళకారులు కనిపించరు. ఈ మేరకు ఆల్ ఇండియా సినీ వర్కర్స్ అసోసియేషన్ (AICWA) కీలక నిర్ణయం తీసుకుంది. జమ్ము కశ్మీర్‌లోని పుల్వామా ఉగ్రదాడిలో 44 మంది జవాన్లు అమరులైన నేపథ్యంలో భారత సినీ పరిశ్రమలో ఇకపై పాకిస్థాన్ నటులు, గాయకులు, ఇతరాత్ర కళాకారులను ప్రోత్సహించబోమని AICWA ప్రకటించింది.

ఈ సందర్భంగా AICWA ప్రధాన కార్యదర్శి రోనక్ సురేష్ జైన్ సోమవారం అధికారిక ప్రకటన కూడా విడుదల చేశారు. ‘‘పుల్వామాలో భారత జవాన్లపై దాడిని భారత సినీ వర్కర్ల అసోసియేషన్ తీవ్రంగా ఖండిస్తోంది. జవాన్ల కుటుంబాలకు మా సానుభూతి వ్యక్తం చేస్తున్నాం. అమానవీయత, తీవ్రవాదానికి వ్యతిరేకంగా దేశానికి మద్దుతుగా ఉంటాం. మన ఇండస్ట్రీలో పనిచేస్తున్న పాకిస్థాన్ నటులు, కళాకారులపై పూర్తిగా బ్యాన్ విధిస్తున్నట్లు అధికారికంగా ప్రకటిస్తున్నాం. ఆ దేశ నటులు, కళాకారులతో ఎవరైనా పనిచేస్తున్నట్లు తెలిస్తే కఠిన చర్యలు తీసుకుంటాం’’ అని ప్రకటనలో తెలిపారు.