జాతీయ గీతం వస్తుంటే కుర్చున్నాడని.. సినిమా హాల్‌లో రచ్చ రచ్చ!

సినిమా హాల్‌లో జాతీయ గీతం వస్తున్నా నిలుచోకుండా అగౌరవపరిచిన యువకుడిని పోలీసులు అరెస్టు చేశారు. బెంగళూరులోని గరుడా మాల్‌లోని మల్టిప్టెక్స్‌ థియేటర్‌లో ‘అవేంజర్స్ ఎండ్‌గేమ్’ సినిమాకు వెళ్లిన జితిన్ చాంద్.. జాతీయ గీతం వస్తున్న సమయంలో నుంచోలేదు. దీంతో పక్కనే ఉన్న సురేష్ కుమార్ అనే వ్యక్తి జితిన్‌ను నిలుచోవాలని కోరాడు.

దీంతో ఇద్దరి మధ్య వాగ్వాదం నెలకొంది. అది పెద్ద గొడవగా మారడంతో ప్రేక్షకులంతా వారిని బయటకు వెళ్లిపోవాలని కోరారు. దీంతో ‘ఐనాక్స్’ థియేటర్ సిబ్బంది జితిన్‌ను బయటకు పంపేశారు. ఈ ఘటనపై పోలీసులకు ఫిర్యాదు అందడంతో జితిన్‌ను అరెస్టు చేశారు. జితిన్ ఇటీవలే ఆస్ట్రేలియా నుంచి ఇండియాకు తిరిగి వచ్చినట్లు తెలిసింది. అతడు బెంగళూరులోని సత్యనగర్‌లో నివసిస్తున్నాడని పోలీసులు తెలిపారు. జాతీయ గీతాన్ని అగౌరవపరిచాడనే కారణంతోనే జితిన్‌ను అరెస్టు చేశామన్నారు. ప్రస్తుతం జితిన్ బెయిల్ మీద విడుదలయ్యాడు.

ఈ ఘటనపై జితిన్ ట్విట్టర్ ద్వారా స్పందించాడు. అతనిపై తప్పుడు ఆరోపణలు చేసి పోలీసులతో అరెస్టు చేయించారని తెలిపాడు. ఐనాక్స్ థియేటర్ తనను బలవంతంగా బయటకు గెంటేశారని, అంతా ఆ హాల్‌ను బహిష్కరించాలని కోరాడు. తాను జాతీయ గీతం వస్తుంటే నిలుచోలేదనే కారణంతో తన పక్కన ఉన్న వ్యక్తి ముఖం మీద గుద్దాడని, ఇతర ప్రేక్షకులు సైతం తనను దుర్భషలాడారని చెప్పుకొచ్చాడు.