కోవిడియెట్స్.. లాఠీలకు శానిటైజర్లు రాసి మరీ బాదుడు, ఈ జాబితాలో చేరొద్దు!

కోవిడియెట్స్.. ఇదేంటీ కొత్తగా ఉంది పదం అనుకుంటున్నారా? దీని అసలు అర్థం.. Covid + Idiot (కోవిడ్ + ఇడియెట్). కరోనా వైరస్ (కోవిడ్ 19) నేపథ్యంలో ప్రపంచమంతా లాక్‌డౌన్ విధించిన సంగతి తెలిసిందే. అయితే, ప్రజలు మాత్రం ఇళ్లల్లో ఉండకుండా బయట షికారు చేస్తున్నారు. ఇలా నిబంధనలు ఉల్లంఘించి బయట తిరుగుతున్నవారిని ‘కోవిడియెట్స్’ అని పిలుస్తున్నారు. ఈ కోవిడియెట్స్ ఇప్పటివరకు యూఎస్, యూకే, తదితర దేశాల్లోనే కనిపించారు. లాక్‌డౌన్ నిబంధనలు ఉల్లంఘించి బయటకు వచ్చి జనాలతో కలిసి పార్టీలు చేసుకుంటూ పాలకులకు సవాళ్లు విసిరుతున్నారు. ఇప్పటికీ ఇలాంటి కేసులు నమోదవుతూనే ఉన్నాయి.

ఇక ఇండియా విషయానికి వస్తే.. ప్రధాని నరేంద్ర మోదీ పిలుపిచ్చిన ‘జనతా కర్ఫ్యూ’ నుంచి కోవిడియెట్స్ సంఖ్య పెరుగుతూ వచ్చింది. ఆ రోజు సాయంత్రం 5 గంటలకు ఇళ్లల్లో ఉండి చప్పట్లు కొట్టమంటే.. జనాలంతా వీధుల్లోకి వచ్చి ఇండియా ‘వరల్డ్ కప్’ గెలిచినట్లుగా సంబరాలు చేసుకున్నారు. అసలు జనతా కర్ఫ్యూ విధించే జనాలను దూరంగా దూరంగా ఉంచడానికి. కానీ, దీనిపై అవగాహన లేని ప్రజలు ఇలా బయటకు వస్తున్నారు. ఇప్పుడు 21 రోజులు కర్ఫ్యూ విధించినా ప్రజలు రోడ్ల మీదకు రావడం మానడం లేదు. దీంతో పోలీసులు తమదైన శైలిలో సమాధానం చెబుతున్నారు. లాఠీలకు శానిటైజర్లు రాసి మరీ ప్రజలపై ప్రయోగిస్తున్నారు.