ఇంటి పైకెక్కిన మొసలి.. కర్ణాటక వరదల్లో సిత్రం!

భారీ వరదలు కేరళ, కర్ణాటక రాష్ట్రాలను భయకంపితులను చేస్తున్నాయి. ఒక వైపు పీకల్లోతు నీరు ముంచెత్తుతుంటే.. మరోవైపు మొసళ్లు, విష సర్పాలు ప్రాణసంకటంగా మారాయి. తాజాగా కర్ణాటకలోని బెల్గమ్‌లో సహాయక చర్యల్లో పాల్గొన్న రెస్క్యూ సిబ్బందికి పూర్తిగా నీటిలో మునిగిన ఇంటి పైకప్పుపై ఓ మొసలి నోరు తెరిచి కనిపించింది.

దీంతో షాకైన సిబ్బంది దాన్ని వీడియో సోషల్ మీడియాలో పోస్టు చేయడంతో వైరల్‌గా మారింది. నదులు ఉప్పొంగి ప్రవహిస్తుండటం వల్ల తీర ప్రాంతాల్లోని అడవుల్లో ఉండే జంతువులు సైతం కొట్టుకుని జనవాసాల్లోకి వస్తున్నాయి. గతేడాది కేరళ వరదల్లో కూడా ఇదే పరిస్థితి ఏర్పడింది. వరద తగ్గిన తర్వాత ఇళ్లల్లో అనేక విష సర్పాలు బయటపడ్డాయి.

ఇటీవల గుజరాత్‌లోని వడోదరలో సైతం వరద నీటితోపాటు మొసళ్లు కొట్టుకొచ్చాయి. అంతా చూస్తుండగానే ఓ మొసలి కుక్కపై దాడి చేసింది. దీంతో వరద నీటి నుంచి నడవాలంటేనే ప్రజలు భయపడిపోతున్నారు. ఇన్ని ప్రతికూలతల్లో కూడా అధికారులు నిస్వార్థంగా పనిచేస్తూ బాధితులను సురక్షిత ప్రాంతానికి తరలించడం గమనార్హం.
వీడియో: