Bihar to U.S : దళిత కుర్రాడి ఘనత.. రూ.2.5 కోట్ల స్కాలర్‌షిప్

Bihar Boy to America: పేరు ప్రేమ్ కుమార్. వయసు 17 ఏళ్లు. బీహార్ రాజధాని పాట్నాకి చెందిన విద్యార్థి. అమెరికాలో (United States) గ్రాడ్యుయేషన్ చదివేందుకు వీలుగా రూ.2.5 కోట్ల స్కాలర్‌షిప్ పొందాడు. ఫుల్వరిషరీఫ్ లోని గోన్పురా గ్రామానికి చెందిన ప్రేమ్ కుమార్... ఓ రోజు కూలీ కొడుకు. ఇంకా చెప్పాలంటే... అతని కుటుంబంలో కాలేజీకి వెళ్లి చదువుకున్న తొలి వ్యక్తి ప్రేమే. మరోలా చెప్పాలంటే... మీడియా రిపోర్టుల ప్రకారం ఇలాంటి స్కాలర్‌షిప్ పొందిన తొలి మహా దళిత విద్యార్థి అతనే. ప్రస్తుతం శోషిత్ సమాధాన్ కేంద్రంలో 12వ తరగతి చదువుతున్నాడు ప్రేమ్. వచ్చే సంవత్సరం అమెరికా... పెన్సిల్వేనియా (Pennsylvania)కి వెళ్తాడు. అక్కడ మెకానికల్ ఇంజినీరింగ్ అండ్ ఇంటర్నేషనల్ రిలేషన్స్ లో బ్యాచిలర్స్ డిగ్రీ పొందబోతున్నాడు. ఇందుకోసం అక్కడి లఫాయెట్టే కాలేజీ (Lafayette College)లో చదవబోతున్నాడు.

ప్రేమ్ కుమార్ సాధించినది మామూలు ఘనత కాదు. అది మామూలు కాలేజీ కాదు. ఎప్పుడో 1826లో స్థాపించినది. అమెరికాలో అదో ప్రముఖ ఇంజినీరింగ్ కాలేజీ. ఆ కాలేజీయే స్వయంగా ఈ స్కాలర్‌షి‌ప్‌కి అతన్ని ఎంపికచేసింది. ప్రేమ్ తో పాటూ ఈ ప్రతిష్టాత్మక డయ్యర్ ఫెలోషిప్ (Dyer Fellowship)కి మరో ఐదుగుర్ని ఎంపిక చేసింది.

డయ్యర్ ఫెలోషిప్ అంటే ఏంటి?
ఇదో రకమైన స్కాలర్‌షిప్. అందరికీ ఇవ్వరు. అత్యంత అసాధారణమైన విద్యార్థులకు మాత్రమే ఇస్తారు. యూనివర్శిటీ అధికారుల ప్రకారం... ఆ విద్యార్థుల్లో చదువుకోవాలనే కోరిక బలంగా ఉంటుంది. విపరీతమైన ప్రేరణ కలిగివుంటారు. ఇతరులపై ఇట్టే ప్రభావం చూపిస్తారు. సమస్యల పరిష్కారంలో ఏమాత్రం వెనక్కి తగ్గని విధంగా ఫోకస్ చేస్తారు.. అలాంటి వాళ్లను ఎంపిక చేస్తున్నారు. ప్రేమ్ అలాంటివాడే.

ఈటీవీ భారత్ ప్రకారం... "తగిన గుర్తింపు లేని వర్గాల పట్ల మీరు చూపించే మీ నిబద్ధత, పట్టుదల చూసి మేము ప్రేరణ పొందాం. శుభాకాంక్షలు" అంటూ 17 ఏళ్ల ప్రేమ్ కి ఆమోదపత్రాన్ని రాసి పంపారు కాలేజీ అడ్మిషన్ డీన్ మాథ్యూ ఎస్ హైడ్.

స్కాలర్‌షిప్‌ని ఎలా వాడుతారు?
ప్రేమ్ తను పొందిన స్కాలర్‌షిప్‌ని తన చదువుకి సంబంధించిన ప్రత్యక్ష, పరోక్ష ఖర్చులన్నింటికీ వాడుకోవచ్చు. ట్యూషన్ ఫీజు, వసతి గృహం, రవాణా ఖర్చులు, హెల్త్ ఇన్సూరెన్స్, పుస్తకాల కొనుగోళ్లు వంటి వాటికి వాడుకోవచ్చు. భారత్‌తో పోల్చితే డాలర్ విలువ చాలా ఎక్కువ. ప్రస్తుతం ఒక డాలర్... రూ.79గా ఉంది. అంటే రూ.2.5 కోట్లు అనేది డాలర్లలో చెప్పుకుంటే $3,14,821 తో సమానం. అమెరికాలో జీవన వ్యయం (Cost of living) చాలా ఎక్కువ అవుతుంది. కాబట్టి ఈ డబ్బును జాగ్రత్తగా ఖర్చుపెట్టుకోవాల్సి ఉంటుంది.
Plane on Road : రోడ్డుపై దిగిన విమానం.. వాహనదారులకు ఆశ్చర్యం
"నా తల్లిదండ్రులు ఎప్పుడూ స్కూలుకు వెళ్లలేదు. ఇది నమ్మశక్యం కాని విధంగా ఉంది" అని ప్రేమ్ తెలిపాడు. "ది డిక్స్‌టెరిటీ గ్లోబల్ (Dexterity Global) ఆర్గనైజేషన్ బీహార్‌ లో మహా దళిత పిల్లల కోసం ఎంతో గొప్పగా పనిచేస్తోంది. వారి కృషి వల్లే నేను దీన్ని పొందగలిగాను. నాకు చాలా సంతోషంగా ఉంది" అని ప్రేమ్ వివరించాడు.
Bird With Hangover : మద్యం మత్తులో పక్షి .. ఏం చేసిందో చూడండి
డిక్స్‌టెరిటీ గ్లోబల్ ‌ని 2016లో అండర్ 30లో ఫోర్బ్స్ గుర్తించింది. ఇదో సామాజిక ఔత్సాహిక సంస్థ. డిక్స్‌టెరిటీ నుంచి కాలేజ్ కి వెళ్లే విద్యార్థుల అభివృద్ధి కార్యక్రమంలో భాగంగా ఇప్పటివరకూ తమ విద్యార్థులకు రూ.100 కోట్ల దాకా స్కాలర్‌షిప్‌లు వచ్చినట్లు సంస్థను స్థాపించిన శరద్ సాగర్ తెలిపారు.