పొట్టి దుస్తులు ధరిస్తే రూ.107 ఇస్తా.. మహిళా ఉద్యోగులకు బాస్ ఆఫర్!

పనిచేసే ప్రాంతాల్లో మహిళలపై లైంగిక వేధింపులు ఏ స్థాయిలో ఉంటాయో తెలిసిందే. ఆ వేధింపులను ఆపే బాధ్యత ఆ సంస్థలదే. అయితే, ఓ కంపెనీ తమ మహిళా ఉద్యోగులు పొట్టి దుస్తులు వేసుకురావాలని డ్రెస్ కోడ్ పెట్టింది. అంతేకాదు, ఆ నిబంధనలను ఖచ్చితంగా పాటిస్తే రోజుకు 1.21 పౌండ్‌లు (సుమారు రూ.107) చెల్లిస్తామని ప్రకటించింది.

రష్యాలోని ‘తాత్ప్రోఫ్’ సంస్థ కొత్తగా ఈ రూల్ ప్రవేశపెట్టి వార్తల్లోకెక్కింది. జూన్ 30 వరకు పొట్టి దుస్తులు లేదా పొట్టి స్కర్టులు ధరించే మహిళలకు అదనపు నగదు చెల్లిస్తామని సంస్థ ప్రకటించింది. అంతేకాదు.. ఆ డ్రస్ మోకాలి నుంచి ఐదు సెంటీ మీటర్లు కంటే ఎక్కువ పొడవు ఉండకూడదని రూల్ పెట్టింది. ఎక్కువ మేకప్ వేసుకోకుండదని, తలను కట్టుకోకూడదని పేర్కొంది. ఈ నిబంధనలు పాటించే ఉద్యోగినీలు ప్రూఫ్ కోసం ఆ పొట్టి దుస్తులతో సెల్ఫీ తీసుకుని బాస్‌కు పంపించాలి. కంపెనీలో నిర్వహిస్తున్న ‘ఫెమినిటీ మారథన్’లో భాగంగా మహిళా ఉద్యోగుల మధ్య పోటీ పెట్టేందుకు ఈ నిబంధన పెట్టామని సంస్థ వెల్లడించింది.

‘‘చాలామంది మహిళలు స్వేచ్ఛగా స్కర్టులు వేసుకోవాలని భావిస్తారు. కానీ, ఆఫీసులకు అలా రావడానికి సంకోచిస్తారు. అలాంటి మహిళలకు ఒక అవకాశం కల్పిద్దామనే ఈ రూల్ తీసుకొచ్చాం. పైగా, ఎవరినీ బలవంతం చేయడం లేదు. పైగా ఆఫీసులో స్త్రీ, పురుష సిబ్బంది కలిసి మెలిసి పనిచేయడానికి ఇది ఉపయోగపడుతుంది. మా సంస్థలో తాత్ర్పోఫ్‌లో 550 మంది పురుషులు, 149 మంది మహిళలు పనిచేస్తున్నారు. అంటే 70 శాతం మంది పురుషులే ఉన్నారు. వారిలో ఉత్సాహం నింపాలంటే ఇలాంటి నిర్ణయాలు కూడా తీసుకోవాలి’’ అని సంస్థ కార్పొరేట్ కల్చర్ హెడ్ అనస్తాసియా కిరిల్లోవా తెలిపారు. అయితే, ఈ నిర్ణయాన్ని సామాజికవేత్తలు వ్యతిరేకిస్తున్నారు. ఇది చాలా చౌకబారు నిబంధన అంటూ విరుచుకుపడుతున్నారు.
Photo credit: shutterstock