పైనుంచి 3 రైళ్లు వెళ్లినా బతికాడు.. పోలీసులకు మందుబాబు షాక్!

మందుబాబులు చేసే చేష్టలు భలే క్రేజీగా ఉంటాయి. కొందరు ఎంత తాగినా తమని తాము కంట్రోల్ చేసుకుంటారు. ఇంకొందరు కొంచెం తాగినా భారీ హంగామా చేస్తారు. ఇదిగో ఈ మందుబాబుది కూడా ఇదే బాపతు. ఫుటుగా మద్యం తాగి ఒళ్లు తెలియకుండా రైల్వే పట్టాలపై నిద్రపోయిన అతడి మీద నుంచి వరుసగా మూడు రైళ్లు దూసుకెళ్లాయి.

Also Read: ఏం తెలివి గురూ.. బీరుతో మంటలను ఆర్పేసిన మందుబాబు!

మధ్యప్రదేశ్‌ పోలీసులకు లోకోమోటివ్ పైలట్ (రైలు డ్రైవర్) నుంచి ఫోన్ వచ్చింది. అశోక్‌నగర్ రైల్వే ట్రాక్ మీద ఓ వ్యక్తి శవం పడి ఉందని తెలిపాడు. ఇప్పటికే మూడు రైళ్లు అతడి మీద నుంచి వెళ్లాయన్నాడు. దీంతో పోలీసులు హుటాహుటిన అక్కడికి చేరుకున్నారు. పట్టాలపై ఉన్న వ్యక్తిని చూసి చనిపోయాడని భావించారు. దగ్గరకు వెళ్లి చూస్తుండగా ఆ వ్యక్తి అకస్మాత్తుగా పైకి లేచి హిందీలో.. ‘‘పాపా ఆగయే (నాన్న వచ్చాడు)’’ అన్నాడు. దీంతో పోలీసులు షాకయ్యారు.

Also Read: రూ.100 కోసం.. మర్మాంగాన్ని కొరికేసిన మందుబాబు

పోలీసులు ఆ వ్యక్తిని ధర్మేంద్రగా గుర్తించారు. తాగిన మత్తులో అతడు పట్టాలపైనే నిద్రించాడని తెలిపారు. అయితే, అతడు పట్టాల మధ్యలో కదలకుండా పడుకోవడం వల్ల ఎలాంటి గాయాలు తగల్లేదన్నారు. అతడి మీద నుంచి మూడు రైళ్లు వెళ్లాయనే సంగతి కూడా అతడికి తెలియలేదని తెలిపారు. అతడి ఆసుపత్రికి తరలించి, వైద్య పరీక్షల తర్వాత ఇంటికి పంపేశారు.