పావురానికి బెంజి కారు గిఫ్ట్‌గా ఇచ్చేశాడు.. గుడ్లు పెట్టి కబూతర్ కాపురం!

పావురానికి నాలుగు గింజలు వేయడానికే సందేహించే ప్రజలు ఉన్న ఈ రోజుల్లో.. అతడు ఏకంగా బెంజి కారే గిఫ్టుగా ఇచ్చేశాడు. నీ కుటుంబంతో కారులో పండగ చేస్కో అని దాన్ని అలాగే వదిలేశాడు. అతడి దగ్గర బాగా డబ్బులు ఉన్నాయ్ కాబట్టి.. అలా చేసి ఉంటాడు. అలాంటివి మనకెలా సాధ్యం అనుకుంటున్నారా? ఇక్కడ చూడాల్సింది ‘డబ్బు’ను కాదు. మంచి మనసును.

అతడి స్థానంలో మరో ధనవంతుడు ఉండి ఉంటే.. వెంటనే వాటిని తరిమి కొట్టి ఆ కారును శుభ్రం చేయించుకొనేవాడు. పావురాలపై చీదరించుకొనేవాడు. కానీ, అతడు మాత్రం.. ఆ పావురం ఫ్యామిలీ తన వల్ల డిస్టబ్ కాకూడదని ఆలోచించాడు. తన బెంజి కారులో గుడ్లు పెట్టి.. హాయిగా జీవిస్తున్న ఆ పావురానికి లగ్జరీ లైఫ్ ప్రసాదించాడు.

అయితే, అతడు ఆ పావురాలకు గిఫ్టుగా ఇచ్చిన కారు.. సాధారణమైన కారు కాదండోయ్.. అత్యంత ఖరీదైన బెంజి కారు. దాన్ని గిఫ్టుగా ఇచ్చిన వ్యక్తి మరెవ్వరో కాదు.. దుబాయ్ క్రౌన్ ప్రిన్స్, ఎగ్జిక్యూటివ్ కౌన్సిల్ ఛైర్మన్ షేక్ హందన్ బిన్ మహమ్మద్ బిన్ రషీద్ అల్ ముకుదమ్. ప్రిన్స్ హందన్‌కు మెర్సిడెస్ బెంజ్‌కు చెందిన AMG G63 SUV కారు ఉంది. అయితే, లాక్‌డౌన్ వల్ల చాలా రోజుల నుంచి ఆయన కారును ఉపయోగించడం లేదు.

ఇటీవల గ్యారెజ్‌లోకి వెళ్లిన ఆయన కారు ముందు అంద్దం వద్ద పావురం పుల్లా పుల్లా పేర్చుకుని గూడు పెట్టుకోవడాన్ని చూశారు. సాధారణంగానే ఆయన ప్రకృతి ప్రేమికుడు. మరి, అలాంటి దృశ్యాన్ని చూశాక.. ఆయన స్పందించకుండా ఉండగలరా? వెంటనే తమ పనివాళ్లను పిలిచి.. ‘‘ఆ పావురం అక్కడ గుడ్లు పెట్టి పొదుగుతోంది. దాన్ని అస్సలు కదపొద్దు.. ఆ కారును నేను వాటికి గిఫ్టుగా ఇచ్చేస్తున్నా..’’ అని చెప్పేశారు.

Read Also: ఆ నంది విగ్రహం పెరుగుతోంది.. రోమేనియా తరహాలోనే యాగంటిలో అద్భుతం, వీడిన మిస్టరీ!

ఆయన తీసుకున్న నిర్ణయం వల్ల ఆ పావురం ఇప్పుడు ఆ కారుపై అల్లుకున్న గూడులో గుడ్లు పొదిగింది. ఆ గుడ్ల నుంచి పిల్లలు బయటకు వస్తున్న దృశ్యాలు.. గ్యారేజీలో ఉన్న హెచ్‌డీ సీసీటీవీ కెమేరాలకు చిక్కాయి. ఆ వీడియోలను చూసిన ప్రిన్స్.. చక్కని మ్యూజిక్‌తో ఎడిట్ చేసి తన ఇన్‌స్టాగ్రామ్‌లో పోస్టు చేశారు. అంతే.. ఆ వీడియో క్షణంలో వైరల్‌గా మారింది. ఈ వీడియోను చూస్తున్నంత సేపు మీకు కూడా మంచి ఫీల్ వస్తుంది. మరి ఇంకెందుకు ఆలస్యం? ఈ కింది వీడియో చూసేయండి మరి.

వీడియో: