మండే ఎండల్లో మానవ సేవ.. ప్రజల దాహార్తి తీరుస్తున్న సర్దార్!

సర్దార్‌పై జోకులు కడుపుబ్బా నవ్విస్తాయి. అయితే, వారు పాటించే మానవీయ విలువలు గురించి తెలిస్తే.. తప్పకుండా వారిపై గౌరవం ఏర్పడుతుంది. ఇందుకు ఈ ఘటనే నిదర్శనం. ఎండలు మండిపోతున్న ఈ రోజుల్లో జనాలు బయటకు రావడానికే భయపడుతుంటే.. ఓ సిక్కు వ్యక్తి మాత్రం తన యాక్టివా ముందు నీటి క్యాన్ పట్టుకుని ఢిల్లీ రోడ్లపై తిరుగుతున్నారు.

ఎండలో దప్పికతో అల్లాడుతున్నవారికి దాహార్తి తీర్చుతూ మానవత్వం చాటుతున్నారు. @ZeHarpreet అనే వ్యక్తి ట్వీట్ చేసిన ఈ వీడియో సోషల్ మీడియాలో వైరల్‌గా మారింది. ఈ వీడియోలో రోడ్డు పక్కన స్కూటీపై నీటి క్యాన్లు, మూడు గ్లాసులతో నిలుచుని ఉన్న సర్దార్.. అటుగా వచ్చిపోయే వాహనదారులకు, ఆగివున్న బస్సులో ప్రయాణికుల నీటి బాటిళ్లు నింపి ఇవ్వడం కనిపించింది. ఆయన సేవకు నెటిజన్లు ఫిదా అవుతున్నారు. ఆయన్ని ప్రశంసలతో ముంచెత్తుతూ వీడియోను షేర్ చేసుకుంటున్నారు. అంత వేడిలో తన గురించి ఆలోచించకుండా ఇతరుల దాహార్తి తీర్చుతున్న సర్దార్‌జీ హ్యాట్సాప్ చెప్పకుండా ఉండగలమా! ఇప్పటికైనా నమ్ముతారా.. మానవత్వం ఇంకా బతికి ఉందని!!