‘ఏరియా 51’ ముట్టడి.. ఏలియన్స్‌ను చూసేందుకు ఎగబడిన జనం!

‘ఏరియా 51’ ముట్టడిద్దాం అంటూ ఇటీవల సోషల్ మీడియాలో పెద్ద ఉద్యమమే జరిగింది. చివరికి చెప్పినట్లే.. సెప్టెంబరు 20న ఔత్సాహికులంతా ఒక్కటై ఈ ప్రాంతానికి చేరుకున్నారు. సైన్యం హెచ్చరికలను సైతం బేఖాతరు చేశారు. అయితే, వీరంతా సైనిక స్థావరాలపై దండెత్తలేదు. ‘యూఎఫ్‌వో థీమ్’తో రేవ్ పార్టీ చేసుకుని తిరిగి వెళ్లిపోయారు.

అమెరికా సైన్యం తమకు తెలియకుండా ఏరియా 51లో ఏదో దాస్తుందంటూ సోషల్ మీడియాలో ఇటీవల ఉద్యమం చేపట్టారు. ‘స్టార్మ్ ఏరియా 51, మనల్ని వారు అడ్డుకోలేరు’ అంటూ ఫేస్‌బుక్‌లో ఓ ఇవెంట్‌ను కూడా పోస్టు చేశారు. దీన్ని 15 లక్షలు మందికి పైగా లైక్ చేసి.. మద్దతు తెలిపారు. దీంతో అమెరికా వైమానిక దళం ఘాటుగా స్పందించింది.

Read also: Area 51 అంటే ఏమిటీ? ఆ రహస్య ప్రాంతంలో అడుగుపెడితే ఏం జరుగుతుంది?

ఈ ప్రాంతంలోకి అక్రమంగా చొరబడేందుకు ప్రయత్నిస్తే అడ్డుకుంటామని సైన్యం పేర్కొంది. ఇది యూఎస్ ఎయిర్‌ఫోర్స్‌కు చెందిన ఓపెన్ ట్రైనింగ్ రేంజ్ అని తెలిపింది. ఎయిర్ ఫోర్స్ ఎప్పుడు అమెరికా, దాని ఆస్తులను రక్షించడంలో ముందుంటుందని హెచ్చరించింది. అయితే, ఈ ఇవెంట్‌ను పోస్టు చేసిన వ్యక్తి దీన్ని సీరియస్‌గా తీసుకోవద్దని, జోక్ మాత్రమేనని ప్రకటించారు.

అయితే, చాలామంది దీన్ని జోక్‌గా తీసుకోలేదు. ఇవెంట్‌లో పేర్కొన్నట్లే సెప్టెంబరు 20న (శుక్రవారం) ఏరియా 51కు చేరుకున్నారు. ఏలియన్ మాస్కులు, క్యాప్‌లు ధరించి హడావిడి చేశారు. సుమారు 75 నుంచి 100 మంది అక్కడికి చేరుకున్నారు. సుమారు 13 కిలోమీటర్లు చిమ్మ చీకట్లో, గతుకుల రోడ్డులో రెచెల్ గేట్ వద్దకు చేరారు. ఇక్కడి నుంచి ‘ఏరియా 51’కు చేరాలంటే మరో 19 కిలోమీటర్లు ప్రయాణించాలి.

Read also: అంగారకుడిపై మీ పేరు.. ఇలా చేస్తే NASA నుంచి బోర్డింగ్ పాస్‌లు!

ఈ ఉద్యమం నేపథ్యంలో ముందుగానే అక్కడ పోలీసులు మోహరించారు. ఈ సందర్భంగా కొందరు ఏలియన్స్‌ను చూసేందుకు వదలాలని రచ్చ చేశారు. గేటు వద్ద మూత్రం పోసిన ఓ కెనడా యువకుడిని, పరిధి దాటి లోపలికి ప్రవేశించిన ఓ మహిళను పోలీసులు అదుపులోకి తీసుకున్నారు. ఆ తర్వాత హెచ్చరించి వదిలిపెట్టేశారు. అమెరికాలోని నెవడా రాష్ట్రంలో లాస్ వెగాస్‌‌కు సుమారు 120 కిలోమీటర్ల దూరంలో ఉన్న ఏడారిలో ఉన్న మిలటరీ బేస్‌నే ‘ఏరియా 51’ అని అంటారు. ‘నెవడా టెస్ట్ అండ్ ట్రైనింగ్ రేంజ్’ పేరుతో చెలామణి అవుతున్న ఈ ప్రాంతంలోకి సాధారణ ప్రజలకు అనుమతి లేదు.