ప్రయాణికుడి జోక్.. 16 గంటలు ఆలస్యంగా బయల్దేరిన విమానం!

ఓ ప్రయాణికుడు వేసిన జోక్ వల్ల విమానం 16 గంటలు ఆలస్యంగా బయల్దేరింది. ఈ ఘటన బెంగళూరులో చోటుచేసుకుంది సోమవారం అర్ధరాత్రి తర్వాత 1.20 గంటలకు బెంగళూరులోని కెంపెగౌడ అంతర్జాతీయ విమానాశ్రయం నుంచి సింగపూర్‌కు బయల్దేరాల్సిన విమానం మంగళవారం సాయంత్రం 5.23 గంటలకు బయల్దేరింది.

సింగపూర్ ఎయిర్‌లైన్స్‌ విమానంలో కూర్చున్న ప్రయాణికుడు అతనితో తెచ్చుకున్న క్యాబిన్ బ్యాగ్‌లో గన్ ఉందంటూ విమాన సిబ్బందితో ఎటకారం ఆడాడు. దీంతో అప్రమత్తమైన సిబ్బంది భద్రతా సిబ్బంది సమాచారం ఇచ్చారు. పోలీసులు ఆ ప్రయాణికుడిని అదుపులోకి తీసుకుని ఎయిర్‌పోర్ట్ పోలీస్ స్టేషన్‌కు తరలించారు. కొన్ని గంటలపాటు అతడిని ప్రశ్నించారు.

అతడి బ్యాగ్‌లో ఉన్నది గన్ కాదని, గిటార్ అని చెప్పడంతో అంతా ఊపిరి పీల్చుకున్నారు. సింగపూర్‌ ఎయిర్‌లైన్స్ ఈ ఘటనను నిర్ధారించింది. స్కూట్ ఎయిర్‌లైన్స్ ఫ్లైట్ TR574 (BLR-SIN)లో ఓ వ్యక్తి క్యాబిన్ బ్యాగేజీలో గన్ ఉందని చెప్పగానే ప్రయాణికులందరినీ విమానం నుంచి కిందికి దించివేసి సోదాలు జరిపామని పేర్కొంది. విమానంలో ఉన్న అందరినీ లగేజ్‌ను బయటకు రీస్కాన్ చేశామని తెలిపింది. ప్రయాణికులకు ఇబ్బంది లేకుండా మరొక విమానాన్ని ఏర్పాటు చేశామని వెల్లడించింది.