143 హైదరాబాద్.. ఇండియాలోనే నెంబర్ 1, ఎందుకో తెలుసా?

హైదరాబాద్ అంటే ఇష్టంలేనివారు ఎవరుంటారు చెప్పండి. చక్కని వాతావరణం, రవాణా సదుపాయాలతో ప్రతి ఒక్కరితో ఐ లవ్ హైదరాబాద్ అనిపించుకునే ఈ నగరం ప్రపంచంలోనూ 1.4.3గా నిలిచింది. దేశంలో నివాసయోగ్య నగరాల్లో నెంబరు 1 స్థానాన్ని సొంతం చేసుకుని సగర్వంగా నిలిచింది. హైదరాబాద్‌తో పాటు మహారాష్ట్రలోని పుణె కూడా ఈ స్థానాన్ని పంచుకుంది.

బుధవారం విడుదలైన మెర్సెర్స్ క్యాలిటీ ఆఫ్ లివింగ్ (ఇండియా) ర్యాంకింగ్స్ - 2019 ప్రపంచంలోని నివాసయోగ్య నగరాల జాబితాను విడుదల చేసింది. ఆర్థిక, ప్రజా మౌలిక సదుపాయాల్లో పెట్టుబడులు, మెడికల్ సప్లై, సదుపాయాలు తదితర అంశాల్లో నిర్వహించిన సర్వేలో ఇండియా నుంచి హైదరాబాద్, పుణెలు ప్రపంచంలో 143వ స్థానాన్ని, దేశంలో 1వ స్థానాన్ని కైవసం చేసుకున్నాయి. గతేడాది 142వ స్థానంలో ఉన్న ఈ నగరాలు ఈ సారి ఒక స్థానానికి పడిపోయాయి. ప్రపంచంలోని 231 నగరాల్లో 7 భారత నగరాలు ఉన్నాయి.

వ్యక్తిగత భద్రతలో హైదరాబాద్ 109వ స్థానంలో ఉంది. అయితే, చెన్నై నగరం 105వ స్థానంతో ఆగ్నేయ ఆసియాలో సేఫెస్ట్ సిటీగా నిలవడం గమనార్హం. నేరాలు, న్యాయ వ్యవస్థ, వ్యక్తిగత స్వేచ్ఛ, వ్యక్తిగత సంబంధాలు, పత్రికా స్వే్చ్ఛ, ఇతర దేశాలతో సత్సంబంధాలు వంటివి పరిగణనలోకి తీసుకుని ఈ ర్యాంకింగ్ ఇచ్చారు.