కుక్క ‘అక్రమ సంబంధం’.. ఆ యజమాని చేసిన పనికి జంతు ప్రేమికులు గుర్రు

మానవత్వంలేని కొంతమంది యజమానులు తమ కుక్కలను వివిధ కారణాలతో ఇంటి నుంచి సుదూర ప్రాంతాలకు తీసుకెళ్లి వదిలేస్తారు. అయితే, అవి మాత్రం తమ యజమాని కోసం ఎదురుచూస్తూనే ఉంటాయి. దీంతో జంతు ప్రేమికులు అలాంటి యజమానులపై చర్యలు తీసుకోడానికి ప్రత్యేక చట్టం తీసుకురావాలని డిమాండు కూడా చేస్తున్నారు.

కుక్కల యజమానులు ఇందుకు వేర్వేరు కారణాలు చెబుతున్నారు. ఆ కుక్కలను పోషించడానికి ఆర్థిక స్తోమత సరిపోవడం లేదనో, అవి మాట వినడం లేదనో తెలుపుతుంటారు. అయితే, కేరళకు చెందిన ఓ వ్యక్తి మాత్రం ఇందుకు విచిత్రమైన కారణం చెప్పాడు. మూడేళ్ల వయస్సు గల పోమేరనియన్ రకం ఆడ కుక్కను వదిలిపెట్టేశాడు. ఈ సందర్భంగా దాని కాలర్‌(మెడకు కట్టిన బెల్టు)లో ఒక లెటర్ కూడా పెట్టాడు.

తిరువనంతపురంలోని అనయారా వరల్డ్ మార్కెట్‌లో తిరుగుతున్న ఈ కుక్కను చూసిన ఓ జంట ‘పీపుల్స్ ఫర్ యానిమల్’కు సమాచారం ఇచ్చారు. అక్కడికి చేరుకున్న సంస్థ వాలంటీర్ షమీమ్ ఫరక్ ఆ కుక్కను తన వెంట తీసుకెళ్లాడు. ఈ సందర్భంగా కుక్క కాలర్‌లో లభించిన లేఖను చూసి ఆశ్చర్యపోయాడు.

‘‘ఇది చాలా మంచి బ్రీడ్ కుక్క. మంచి అలవాట్లు ఉన్నాయి. ఎక్కువగా తిండి పెట్టాల్సిన అవసరం లేదు. ఆమెకు ఎలాంటి వ్యాధులు లేవు. ప్రతి ఐదు రోజులకు ఒకసారి స్నానం చేయించేవాళ్లం. గత మూడేళ్లుగా అది ఎవరినీ కరవలేదు. కేవలం అరుస్తుంది అంతే. ఎక్కువగా పాలు తాగుతుంది. గుడ్లు తింటుంది. మా పక్కింట్లో కుక్కతో అది అక్రమ సంబంధం పెట్టుకుంది. అందుకే దాన్ని వదిలేస్తున్నాం’’ అని ఆ లేఖలో ఉంది.
ఆ లేఖ చదివిన వాలంటీర్‌‌కు కాసేపు ఏం మాట్లాడాలో అర్థం కాలేదు. ‘‘ఇలాంటి కేసును మొదటిసారిగా చూస్తున్నాం. కుక్కల్లో కనిపించే సహజ లక్షణమే అది. అలాంటి కుక్కలను ఇంట్లోనే గొలుసుతో కట్టి అలవాటు మాన్పిస్తారు. కానీ, ఇలా రోడ్లపై వదిలిపెట్టరు’’ అని తెలిపారు. శ్రీదేవి కర్దా అనే మహిళ ఈ లెటర్‌ను, కుక్క ఫొటోను ఫేస్‌బుక్‌లో పోస్టు చేయడంతో ఈ ఘటన వైరల్‌గా మారింది. ‘‘మీ కుక్క పవిత్రంగా ఉండాలంటే వెంటనే దానికి పెళ్లి చేయండి. అక్రమ సంబంధం పెట్టుకున్న కుక్కలు కనిపిస్తే మా వద్దకు తీసుకురండి. వాటికి పెళ్లి చేసి, కట్న కానుకలు ఎంత చెల్లించాలో మాట్లాడతాం’’ అని చమత్కరించింది. ప్రస్తుతం ఈ కుక్క ‘పీపుల్స్ ఫర్ యానిమల్’ సంరక్షణలోనే ఉందని, ఆసక్తి ఉన్నవారు దాన్ని ఇంటికి తీసుకెళ్లవచ్చని వాలంటీర్లు ప్రకటించారు.