సూసైడ్ బాంబ్.. వివాహితను హత్తుకుని తనని తాను పేల్చేసుకున్న ప్రియుడు!

లేటు వయస్సులో ఓ వివాహితతో అక్రమ సంబంధం పెట్టుకున్న వ్యక్తి.. నడుము బాంబులు చుట్టుకుని, ఆమెను కౌగిలించుకుని తనని తాను పేల్చేసుకున్నాడు. ఈ ఘటనలో ఇద్దరూ దుర్మరణం చెందారు. కేరళాలోని మూలనకవుకు చెందిన బెన్నీ (45), నయాకట్టికి చెందిన ఇలవానా నాజర్ భార్య అమలా(38)కు మధ్య కొన్నాళ్లుగా అక్రమ సంబంధం నడుస్తోంది.

సుల్తాన్ బాదరే పోలీసుల కథనం ప్రకారం.. గత ఎనిమిదేళ్లుగా ఫ్యామిలీ ఫ్రెండ్స్‌గా ఇరువురి కుటుంబాలకు పరిచయం ఉంది. బెన్నీ, అమలాలు ఒకరిపై ఒకరు మనసు పడటంతో అక్రమ సంబంధం ఏర్పడింది. అమలా ఇంటికి నాలుగు కిలోమీటర్ల దూరంలోనే బెన్నీ నివసిస్తున్నాడు. శుక్రవారం మధ్యాహ్నం దేశీ బాంబులను నడుముకు చుట్టుకుని అమలా ఇంటికెళ్లిన బెన్నీ ఆమెను కౌగిలించుకుని బాంబును పేల్చేసుకున్నాడు. దీంతో ఇద్దరూ అక్కడికక్కడే చనిపోయారు.

అమలకు ముగ్గురు కుమార్తెలు ఉన్నారు. ఈ దాడి జరిగినప్పుడు మూడేళ్ల కూతురు ఇంట్లోనే ఉంది. ఆ సమయానికి ఆమె తల్లి వద్ద లేకపోవడంతో ప్రమాదం నుంచి తప్పించుకుంది. మిగతా ఇద్దరు కూతుర్లు తమ అమ్మమ్మ ఇంటికి వెళ్లారు. ఈ నేపథ్యంలో ఏ కారణంతో ఈ దాడి జరిగిందనేది తెలియరాలేదు. ఇద్దరి మధ్య ఏమైనా స్పర్థలు నెలకున్నాయా, లేదా ఇరువురి కుటుంబాల్లో వారి సంబంధం గురించి తెలియడంతో కావాలనే కలిసి ఆత్మహుతి చేసుకున్నారా అనేది తెలియాల్సి ఉంది. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.