కారులో హెల్మెట్ పెట్టుకోలేదని జరిమానా.. వైరల్ అవుతున్న చలానా

ఓ వ్యక్తి హెల్మెట్ పెట్టుకోకుండా వాహనం నడిపాడని ట్రాఫిక్ పోలీసులు జరిమానా విధించారు. చిత్రం ఏమిటంటే.. వ్యక్తి నడిపిన వాహనం బైక్ కాదు.. కారు. అదేంటీ.. కారు నడిపే వాళ్లు కూడా హెల్మెట్ పెట్టుకోవాలా? కొంపదీసి కొత్త నిబంధనల్లో ఈ రూల్ కూడా పెట్టారా అని భయపడిపోవద్దు. ఈ ఘటన.. కొత్త చలానాలు అమలు చేయడానికి కొద్ది రోజులు ముందే జరిగింది.

ఉత్తరప్రదేశ్‌లోని బరేలీకి చెందిన అనీస్ నరులా అనే వ్యక్తి ట్రాఫిక్ పోలీసులు జులై 26న రూ.500 జరిమానా విధించారు. ఇటీవల అనీస్ ఆన్‌లైన్‌లో చాలానాలను తనిఖీ చేసుకోగా.. హెల్మెట్ లేకుండా బైకు నడిపినందుకు ఆ జరిమానా విధించినట్లు ఉంది. అయితే, అది తన కారు నెంబరు కావడంతో అనీస్ షాకయ్యాడు.

Read also: ట్రాఫిక్ చలానా చెల్లించమంటే.. బైకును తగలెట్టేసిన యువకుడు

అనీస్ ట్రాఫిక్ పోలీస్ స్టేషన్‌కు వెళ్లి ప్రశ్నించగా.. అది సివిల్ పోలీసులు వేసిన జరిమానా అని తెలిపారు. అయితే, సీట్ బెల్ట్‌కు బదులు హెల్మెట్ జరిమానా నమోదు చేసి ఉంటారన్నారు. అయితే, ఆ జరిమానాను వాళ్లు రద్దు చేశారా లేదా అనేది తెలియరాలేదు. ఇందులో సంతోషించ తగిన విషయం ఏమిటంటే.. ఆ జరిమానా జులై నెలలో విధించారు. ఈ నెలలోగానీ విధించి ఉంటే.. బాధితుడికి చుక్కలు కనిపించేవి.

Read also: ట్రాక్టర్ డ్రైవర్‌కు రూ.59,000 జరిమానా.. ట్రాఫిక్ రూల్స్ ఉల్లంఘన ఫలితం!