వధువు వేషంలో ప్రియురాలి పెళ్లికి వెళ్లిన ప్రియుడు.. కానీ, సీన్ రివర్స్!

అక్కడ ఓ అమ్మాయి పెళ్లి జరుగుతోంది. పెళ్లికి ఇంకా సమయం ఉండటంతో అతిథులంతా బయట కూర్చొని కబుర్లు చెప్పుకుంటున్నారు. ఇంతలో వధువులా తయారైన ఓ మహిళ అష్టవంకరలు తిరుగుతూ అక్కడికి వచ్చింది. పెళ్లి కూతురు ఎక్కడ ఉందని అడిగింది. అతిగా వయ్యారం వలకబోస్తున్న ఆ మహిళ గొంతు విని.. అతిథులకు అనుమానం వచ్చింది. ‘‘ఓ అమ్మాయ్.. ఇలా రా, ఏ ఊరు మనది’’ అని అడిగారు. ‘‘మాదీ ఈ ఊరే’’ అని గంభీరంగా చెప్పింది. దీంతో వారికి సీన్ అర్థమైంది. జనాలంతా కలిసి అక్కడికక్కడే ఆ మహిళ చీర లాగేశారు. అయ్యో.. పాపం అనుకోకండి. ఎందుకంటే.. ఆమె మహిళ కాదు. ఆడ వేషంలో ఉన్న వధువు ప్రియుడు. ఈ ఘటన ఉత్తరప్రదేశ్‌లో చోటుచేసుకుంది.

బదోహీలో పెళ్లి చేసుకుంటున్న ప్రియురాలని కలిసేందుకు ఆ యువకుడికి ఈ ఐడియా వచ్చింది. అయితే, సాధారణ చీర కట్టుతో అక్కడికి వెళ్లి ఉంటే ఎవరూ కనిపెట్టకపోయేవారు. కానీ, అతడు ఎర్ర చీర కట్టుకుని, ఫుల్‌గా మేకప్ వేసుకుని వధువులా తయారై వెళ్లాడు. హైహీల్స్ వేసుకుని, చేతిలో పర్సు పటుకుని టిక్కుటిక్కు అని నడుస్తున్న అతడిని చూడగానే జనాలకు అనుమానం వచ్చింది. పోనీ.. అక్కడికి వెళ్లిన తర్వాత అతడు సైలెంట్‌గా ప్రియురాలిని చూసి రాకుండా.. బయట ఉన్న అతిథులను పలకరించాడు. అంకుల్ పెళ్లి కూతురు ఎక్కడా? అనగానే.. ఇంతకీ నువ్వు ఎవరూ అని ప్రశ్నించడంతో గుట్టు రట్టయ్యింది.

పాపం అతగాడు ముఖానికి ముసుగు వేసుకుని మహిళలా ఉండేందుకు చాలా ప్రయత్నించాడు. కానీ, ఎవరో వెనకాల నుంచి అతడి విగ్గును గట్టిగా లాగారు. అంతే.. పెట్టుడు జుట్టుతోపాటు.. అతడి పరువు కూడా పోయింది. దొరికితే అంతా కుమ్మేస్తారని తెలియడంతో.. అతడు ‘ఉసేన్ బోల్ట్’ను తలచుకుని పరుగు పెట్టాడు. అప్పటికే బయట వేచి చూస్తున్న ఇద్దరు స్నేహితులు అతడిని బైకు మీద కూర్చోబెట్టుకుని మెరుపు వేగంతో మాయమయ్యారు. అయితే, అతడు ఆడ వేషంలో ఆమెను కలవడానికి ఎందుకు వచ్చాడనేది ఇప్పటికీ మిస్టరీనే. ఆమెను ఎత్తుకెళ్లాడానికి వచ్చాడా? లేదా చివరిగా చూసి వెళ్దామని వచ్చాడా అనేది తెలియాల్సి ఉంది. దీనిపై రచ్చ ఎందుకుని పోలీసులకు కూడా ఫిర్యాదు చేయలేదు.

వీడియో:
Also Read: దేవుడి ముంగిట ‘దెయ్యాలు’.. ఈ గుడికి వెళ్లాలంటే గుండె ధైర్యం ఉండాలి!

Also Read: ఆ గుడిలో అమ్మవారి విగ్రహాలు మాట్లాడతాయి, పరిశోధనల్లో తేలింది ఏమిటంటే..

Read Also: హైసెక్యూరిటీ జైలుకు చెంచాలతో కన్నం వేసి ఖైదీలు పరార్, ఇదో థ్రిల్లింగ్ మిస్టరీ!

Read Also: ‘అన్నాబెల్లె’.. భయపెట్టే ఈ బొమ్మ రియల్ స్టోరీ తెలిస్తే గుండె ఆగుతుంది!