నిద్రపోతే రూ.13 లక్షలు.. నాసా బంపర్ ఆఫర్!

నిద్రపోవడమంటే మీకు బాగా ఇష్టమా? అయితే, మీరు ఈ ఉద్యోగానికి అర్హులే. రెండు నెలల పాటు బెడ్ మీద హాయిగా నిద్రపోతే నాసా మీకు రూ.13 లక్షలు చెల్లిస్తుంది. ఇదేదో నిద్రలో వచ్చిన కల కాదండోయ్.. నిజం! యురోపియన్ స్పేస్ ఏజన్సీ (ECA)తో కలిసి నాసా సంస్థ ఆర్టిఫిషియల్ గ్రావిటీ (కృత్రిమ గురుత్వాకర్షణ)పై అధ్యయనం జరుపుతోంది.

ఈ నేపథ్యంలో మనుషులు నిద్రపోతున్నప్పుడు గురుత్వాకర్షణ శక్తి ఎంత ఉంటుందో తెలుసుకునేందుకు పరిశోధనలు జరుపుతోంది. అంతరిక్షం వాతావరణంలో వ్యోమగాములకు మరింత సౌకర్యాన్ని అందించేందుకు నాసా తొలిసారిగా ఈ ప్రయోగం చేయపడుతోంది. ఈ సందర్భంగా 24 నుంచి 55 ఏళ్ల వయస్సు గల 12 మంది పురుషులు, 12 మంది మహిళలు అవసరమని నాసా పేర్కొంది. వీరు రెండు నెలలపాటు బెడ్ మీద నిద్రపోతే చాలు. అంతకుమించి ఇంకేమీ చేయక్కర్లేదు. ఇందుకు నాసా వారికి రూ.12.81 లక్షలు చెల్లిస్తుంది.
ఆర్టిఫిషియల్ గ్రావిటీ బెడ్ రెస్ట్ (AGBRESA) అనే ఈ స్టడీని కొలగ్నేలోని జర్మనీ ఏరో స్పేస్ సెంటర్ (డీఎల్ఆర్)లో నిర్వహిస్తారు. ఈ స్టడీ జరుగుతున్నప్పుడు వాలంటీర్లు ఎవరూ బయటకు వెళ్లకూడదు. కృత్రిమ గురుత్వాకర్షణలో వారి జ్ఞానశక్తి, కండరాల సామర్థ్యం, గుండె పనితీరు వంటి అంశాలను తెలుసుకుంటారు. ఈ అధ్యయనం ఫలవంతమైతే వ్యోమగాములు నివసించే అంతర్జాతీయ అంతరిక్ష కేంద్రం (ఐఎస్ఎస్)లో యాంటీ గ్రావిటీ పరికరాలను ఏర్పాటు చేయనుంది.