National Book Lovers Day : పుస్తకాలు ఎందుకు చదవాలి? కొన్ని నిజాలు

National Book Lovers Day 2022 : పిల్లలకు పాకే వయసు రాగానే తల్లిదండ్రులు... ప్రత్యేక కార్యక్రమం జరుపుతారు. ఎదురుగా ఓ కత్తి, పుస్తకం, డబ్బు, ఆహారం ఇలాంటివి ఉంచి... వాటిలో ఏదో ఒకటి పట్టుకోమని ఎంకరేజ్ చేస్తారు. ఏది పట్టుకోవాలన్నది చిన్నారికే వదిలేస్తారు. కానీ మనసులో వారంతా కోరుకునేది ఒకటే పుస్తకం పట్టుకోవాలి అని. ఎందుకంటే... చదువు అంటే... సాక్ష్యాత్తూ సరస్వతీ దేవి. చిన్నారి పుస్తకమో, పెన్నో పట్టుకుంటే... అమ్మ ఒడి చేరినట్లే. ఇక అన్నీ అమ్మే చూసుకుంటుంది అనీ.. విద్యాబుద్ధులు నేర్పి.. తీర్చిదిద్దుతుందని తల్లిదండ్రులు భావిస్తారు. అదీ పుస్తకాలకూ, చదువుకూ ఉన్న విలువ. మనకు ఆస్తులుగా ఇళ్లు, పొలాలు ఉన్నాయని గొప్పగా చెప్పుకోలేం.. కానీ పుస్తకాలు ఉన్నాయని చెప్పుకోగలం. ఎందుకంటే... పుస్తకాల్ని కలిగివుండే వాళ్లను సమాజం గౌరవిస్తుంది. పుస్తకాలు చదివేవాళ్లను సమాజం అభిమానిస్తుంది. బుక్స్ చదివేవాళ్లు విజ్ఞానవంతులుగా సమాజం భావిస్తుంది. కాబట్టే మనమంతా బుక్స్ చదవాలి. మీకు తెలుసా? IIT, IIM లలో రోజుకో బుక్ చదివేసి, రివ్యూ రాయాలని చెబుతారు. అక్కడ ఎడ్యుకేషన్ ఆ రేంజ్‌లో ఉంటుంది. అందుకే ఏటా పుస్తక ప్రియుల కోసం ఆగస్ట్ 9న జాతీయ పుస్తక ప్రియుల దినోత్సవం జరుపుతున్నారు. దీని ప్రాధాన్యం, చరిత్ర, నిజాలు తెలుసుకుందాం.

పుస్తకాలే మేలు (Books are better than videos)
ఈ రోజుల్లో పుస్తక పఠనం బాగా తగ్గిపోయింది. మొబైల్స్ వచ్చాక.. వీడియోలు చూస్తూ... కొత్త విషయాలు నేర్చుకుంటున్నారు. అయినప్పటికీ బుక్స్ బుక్సే. స్వయంగా చదివినదానికీ, వీడియోలో చూసిన దానికీ చాలా తేడా ఉంటుంది. స్వయంగా చదివేటప్పుడు.. మనకు నచ్చినట్లుగా నెమ్మదిగా చదువుతాం. బ్రెయిన్ బాగా అర్థం చేసుకుంటుంది. ఆలోచిస్తుంది, విశ్లేషిస్తుంది, ప్రశ్నలు లేవనెత్తుతుంది.. ఈ ప్రక్రియ అంతా మన కంట్రోల్‌లో జరుగుతుంది. అదే వీడియోలతో సబ్జెక్ట్ నేర్చుకోవాలి అనుకుంటే.. ఈ ప్రక్రియ జరగదు. అందుకే మనకు సబ్జెక్ట్ బాగా రావాలంటే.. పుస్తకాలు చదివి.. అర్థం చేసుకొని, విశ్లేషించుకోవడం బెస్ట్ వే.

చరిత్ర ఘనం (National Book Lovers Day History)
90ల వరకూ మొబైల్స్ లేవు కాబట్టి... అప్పటి వాళ్లంతా పుస్తకాలు చదివేవాళ్లు. ఇప్పటి వాళ్లు కూడా చదువుతున్నా... వారి ఫోకస్‌ని మొబైల్స్ దెబ్బతీస్తున్నాయి. ఈ పుస్తకాలకు వేల ఏళ్ల చరిత్ర ఉంది. ఆదిమానవులు.. గుహల్లోని రాళ్లపై రాతలు రాసి, బొమ్మలు వేసేవారు. తద్వారా అవి వారికి తరచూ కనిపిస్తూ విషయాల్ని గుర్తుచేసేవి. కాలక్రమంలో తాళపత్రాలు వచ్చాయి. తాటిచెట్టు ఆకులు, ఇతర ఆకుల్ని ఎండబెట్టి.. వాటిపై సిరాతో రాసేవాళ్లు. తర్వాత చెక్కలను సన్నగా చెక్కి... వాటిపై రాసేవాళ్లు. తర్వాత కాగితాల వాడకం వచ్చింది. ఇది తక్కువ ఖర్చుతో, ఎక్కువ సౌకర్యంతో ఉండటం వల్ల ప్రపంచం మొత్తం ముద్రణ మొదలైంది.

క్రీస్తు శకం 1436లో జర్మనీలో జొహన్నెస్ గుటెన్‌బెర్గ్ (Johannes Gutenberg).. ప్రింటింగ్ ప్రెస్ కనిపెట్టారు. బైబిల్స్ ముద్రణ కోసం దీన్ని కనిపెట్టినా... తర్వాతి కాలంలో వీటితోపైటూ టైప్ రైటర్లు, కంప్యూటర్లు అన్నీ.. రకరకాలుగా ఉపయోగపడుతున్నాయి. ప్రస్తుతం ప్రత్యేక ఎడ్యుకేషన్ టాబ్లెట్లు కూడా వచ్చేశాయి. మొబైళ్లలో ఆన్‌లైన్ రీడింగ్ రోజురోజుకూ పెరుగుతోంది. చేతిలోకి లైబ్రరీ వచ్చేసింది. తాజాగా వీడియో లైబ్రరీలు మొదలవుతున్నాయి. భవిష్యత్తులో హోలోగ్రామ్ టెక్నాలజీతో... గాలిలోనే బుక్స్ కనిపించే రోజులు వస్తాయి అంటున్నారు.

పుస్తకం చదవండి (National Book Lovers Day Significance)
మనం రోజూ ఏదో ఒకటి చదువుతూనే ఉంటాం. ఇవాళ ప్రత్యేకించి పుస్తక ప్రియుల దినోత్సవం కాబట్టి.. మీకు నచ్చిన పుస్తకాన్ని ఆఫ్‌లైన్ లేదా.. ఆన్‌లైన్‌లో చదవమని నిపుణులు సూచిస్తున్నారు. ఆ పుస్తకం మిస్టరీ కావచ్చు, ఫాంటసీ కావచ్చు, చందమామ కథలు కావచ్చు, సైన్స్ ఫిక్షన్ కావచ్చు.. నచ్చినది చదవడంలో ఆనందమే వేరు కదా.

పుస్తకాన్ని గిఫ్టుగా ఇవ్వండి (Give Books as Gifts)ఫ్రెండ్స్ కి ఏదైనా గిఫ్ట్ ఇవ్వాలంటే బుక్ ఇవ్వడం సరైనది అంటున్నారు నిపుణులు. ఎందుకంటే.. మీరు ఇచ్చే బుక్ వారితో ఎప్పటికీ ఉంటుంది. వీలు దొరికినప్పుడు దాన్ని చదువుతారు. అప్పుడు మీరు గుర్తొస్తారు. మీకు కాల్ చేసి మాట్లాడతారు. ఇలా బుక్స్ మనలో స్నేహభావాన్ని పెంచుతాయి. ప్రతీ ఊరిలో లైబ్రరీ ఉంటే ఎంతో బాగుంటుంది. వాటిలో పుస్తకాల్ని కూడా ప్రతి రెండు వారాలకు ఓసారి మార్చుతూ... అలా రెండు రాష్ట్రాల్లో భారీ ఎత్తున లైబ్రరీల్ని ప్రోత్సహిస్తే... మనలో చదవాలనే ఆసక్తి బాగా పెరుగుతుంది. ఆల్రెడీ ఉన్న లైబ్రరీలను కూడా ఆధునీకరించాలి. టెక్నాలజీని వాడుకుంటూ... ప్రపంచంలోని అన్ని రకాల బుక్సూ అందరికీ అందుబాటులోకి వచ్చేలా చేస్తే.. ఎంతో బాగుంటుంది. కరోనా వచ్చాక ఇలాంటివి ఎన్నో చేశాం... ఇది చెయ్యలేమా?