Asteroid: భారీ గ్రహశకలం భూమివైపు వస్తోంది.. నాసా ఏం చెప్పింది?

మన భూమివైపు వచ్చే చాలా గ్రహశకలాల్ని భూమి కంటే 1300 రెట్లు పెద్దదైన గురుగ్రహం (Jupiter) లాక్కుంటోంది. అందువల్లే భూమి సేఫ్‌గా ఉంటోంది. ఐతే... కొన్ని పెద్ద గ్రహశకలాలు... గురుగ్రహానికి కూడా దొరకకుండా భూమివైపు వస్తున్నాయి. అలాంటి వాటిలో 4660 నెర్యూస్ (Nereus) గ్రహశకలం డిసెంబర్ 11న భూమికి దగ్గరగా రాబోతోంది. దీన్ని అమెరికా స్పేస్ రీసెర్చ్ సెంటర్ నాసా (NASA) చాలా కాలంగా పరిశీలిస్తోంది. ఇది పెద్ద గ్రహశకలం. ప్యారిస్‌లోని ఈఫిల్ టవర్ కంటే పెద్దది. ఫుట్‌బాల్ మైదానాలు 3 కలిపితే ఎంత పెద్దగా ఉంటాయో... అంత పెద్దది. అందుకే ఇది ఎట్టి పరిస్థితుల్లో భూమిని ఢీకొట్టకూడదని నాసా శాస్త్రవేత్తలు చెబుతున్నారు.

భూమికి ప్రమాదకరమైన గ్రహశకలాల్ని నాసా పొటెన్షియల్లీ హజార్డోస్ ఆస్ట్రరాయిడ్స్ (PHA) అని పిలుస్తుంది. వాటిలో నెర్యూస్ కూడా ఉంది. డిసెంబర్ 11న ఇది భూమికి దగ్గరగా వచ్చినప్పుడు... దూరం... 39 లక్షల కిలోమీటర్లు ఉంటుంది. అంటే... భూమికీ, చందమామకీ మధ్య ఉన్న దూరానికి 10 రెట్లు ఎక్కువ దూరమే. అందువల్ల ఇది భూమిని ఢీకొట్టే అవకాశాలు 1 శాతం కూడా లేవు. కాకపోతే ఒక సమస్య ఉంది. ఇది 330 మీటర్ల పొడవున్న గ్రహశకలం. అందువల్ల ఇది వచ్చే దారిలో... మరేదైనా పెద్ద రాయి దీనికి అడ్డుపడితే... అప్పుడు దీని రూట్ మారుతుంది. అప్పుడు ఇది భూమివైపు తిరిగితే ఇబ్బందే. అందుకే ఇది వచ్చి, వెళ్లిపోయే వరకూ నాసా దీన్ని జాగ్రత్తగా గమనించాలని డిసైడైంది.

మన సౌరకుటుంబంలో 90 శాతం గ్రహశకలాలు... నెర్యూస్ కంటే చిన్నవే. ఐతే... పెద్ద గ్రహశకలాలతో పల్చితే... నెర్యూస్ చిన్నదే. దీన్ని 1982లో అమెరికా అంతరిక్ష పరిశోధకుడు ఎలియనార్ ఎఫ్. హెలిన్ (Eleanor F. Helin) కనిపెట్టారు. ఇలాంటి గ్రహశకలాల్ని అపోలో గ్రూప్ ఆస్ట్రరాయిడ్స్ అంటారు. ఇవి భూమివైపుగా వచ్చి... సూర్యుడి చుట్టూ తిరిగి వెళ్లిపోతాయి. ఈ గ్రహశకలం ప్రతి 664 రోజులకు ఓసారి సూర్యుడి దగ్గరకు వచ్చి వెళ్తుంది. ఐతే... డిసెంబర్ 11 తర్వాత మళ్లీ పదేళ్ల వరకూ ఇది భూమికి దగ్గరగా రాదు. అందువల్ల ఈ 10 రోజులూ నాసా శాస్త్రవేత్తలకు ఇదో సమస్యే.

ధరలు, యుద్ధం, ఉల్కాపాతం.. 2022లో నోస్ట్రడామస్ అంచనాలు
నెర్యూస్ మళ్లీ 2031 మార్చి 2న భూమివైపుగా వస్తుంది. అప్పుడు కూడా కాస్త దూరం నుంచే వెళ్తుంది. ఐతే... 2050 నవంబర్‌లో మాత్రం ఇది భూమికి అతి దగ్గరగా వస్తుంది. ఇక 2060 ఫిబ్రవరిలో... ఎప్పుడూ లేనంత దగ్గరగా వస్తుంది. అందువల్ల ఇప్పుడు ఇది తన దారిలో తాను వెళ్తే... భూమికి ఎలాంటి ఆపదా ఉండదు.