మోదీని విమర్శిస్తుండగా పాక్ మంత్రికి కరెంట్ షాక్, వీడియో వైరల్!

ప్రధాని నరేంద్ర మోదీపై నిత్యం నోరుపాడేసుకొనే పాకిస్థాన్ మంత్రికి ఊహించని చేదు అనుభవం ఎదురైంది. సరిగ్గా మోదీని విమర్శిస్తున్నప్పుడే ఆయనకు కరెంట్ షాక్‌కు గురికావడం చర్చనీయమైంది. ఆర్టికల్ 370 రద్దు తర్వాత పాకిస్థాన్ ప్రభుత్వం ఉక్కిరిబిక్కిరవుతున్న సంగతి తెలిసిందే. ఈ నేపథ్యంలో పాక్ రైల్వే మంత్రి షేక్ రషీద్.. త్వరలో ఇండియా, పాకిస్థాన్‌ల మధ్య యుద్ధం ఉంటుందని జోస్యం చెప్పారు. అంతేకాదు, అవసరమైతే తానే కదన రంగంలోకి దిగి పోరాడతానంటూ ఆవేశపడ్డారు.

భారత్‌ను ఎంత ఎక్కువ విమర్శిస్తే.. అంత ఎక్కువగా పాక్ ప్రజలకు దగ్గరకు కావచ్చనే ఫార్ములాను పాటించే మంత్రి రషీద్.. శుక్రవారం జరిగిన ఓ బహిరంగ సభలోనూ పాత పాటే పాడారు. ‘‘మోదీ వ్యూహం ఏమిటో మాకు తెలుసు..’’ అని కొన్ని సెకన్లలోనే అతని మైక్ షాక్ కొట్టింది. ఆ షాక్ నుంచి తేరుకున్న కొద్ది క్షణాల్లో మళ్లీ మోదీనే విమర్శిచారు. ‘‘ఈ కరెంట్ షాక్‌తో కూడా.. మోడీ ఈ సమావేశంలో పాల్గొన్న జనాల ఆకాంక్షలను దెబ్బతీయలేరు’’ అని కవరింగ్ ఇచ్చుకున్నారు. ఈ వీడియో సోషల్ మీడియాలో వైరల్ కావడంతో భారత నెటిజనులు ఒక ఆట ఆడేసుకుంటున్నారు. ‘‘మోదీ మాట ఎత్తితేనే షాక్ తగిలింది. ఇక ఇండియాతో పెట్టుకుంటే మీ గతి ఏమిటో ఆలోచించుకో’’ అంటూ మాటల యుద్ధం మొదలుపెట్టేశారు.

వీడియో: