Parasite: Everything You Need To Know About Oscar-winning Film
‘పారసైట్’ స్టోరీ: పెద్దోడి ఇంట్లో పేదోడు పాగా.. నరాలు తెగే ఉత్కంఠ, ట్విస్టులు.. అందుకే ఆస్కార్!
ఆస్కార్ విజేతగా యావత్ ప్రపంచాన్ని ఔరా అనిపించిన ‘పారసైట్’ చిత్రాన్ని చూస్తే.. తప్పకుండా మెస్మరైజ్ అవుతారు. ఈ సినిమా పూర్తి కథను ఈ కథనంలో చూడండి.
Samayam Telugu24 Feb 2020, 4:08 pm
ఆస్కార్ అవార్డును సొంతం చేసుకున్న కొరియన్ సినిమా ‘పారసైట్’ చూసిన సినీ ప్రేక్షకులు తప్పకుండా ఆ సినిమాలో లీనమవుతారు. రెండు పేద కుటుంబాలు, ఒక సంపన్న కుటుంబం మధ్య నడిచే ఈ కథ.. ఫ్యామిలీ ఆడియన్స్ను మాత్రమే కాదు, థ్రిల్లర్ సినిమాలను ఇష్టపడేవారిని కూడా కట్టిపడేస్తుంది. ఎందుకంటే.. ఈ సినిమాలో ఉండే ట్విస్టులు అలాంటివి మరి. ఈ సినిమాలో ఏ ఫ్రేమ్ మిస్సయినా.. గందరగోళం తప్పదు. దర్శకుడు అంత శ్రద్ధగా ఈ చిత్రాన్ని తెరకెక్కించాడు మరి. సినీ ప్రేమికులకు కొరియా సినిమా అర్థం కాకపోయినా.. ఇంగ్లీష్ సబ్టైటిల్స్ను చూస్తూ ఈ సినిమాను చూసేస్తున్నారు. ఈ నేపథ్యంలో ఈ సినిమాకు సంబంధించిన కథలోని కొన్ని కీలకమైన సీన్లను కథ రూపంలో ఇక్కడ అందిస్తున్నాం. ఈ కథను చదివిన తర్వాత మీకు కూడా ఆ సినిమాను చూడాలనే ఆసక్తి కలగడం ఖాయం. మరి ఇంకెందుకు ఆలస్యం? ఆ కథ ఏమిటో చూసేద్దామా..
మూడు కుటుంబాలు.. భిన్న పాత్రలు
ఈ సినిమాలో కనిపించే మూడు కుటుంబాలూ కీలకమే. ఈ సినిమాలో కనిపించే మొదటి కుటుంబం.. కిమ్ ఫ్యామిలీ. కిమ్ భార్య పేరు చంగ్ సూక్, కొడుకు పేరు కెవిన్, కూతురి పేరు జెస్సికా (కథ నిమిత్తం వీరిద్దరివీ నకిలీ పేర్లు). రెండో కుటుంబం.. పార్క్ ఫ్యామిలీ. పార్క్ భార్య యోన్, వారి కొడుకు దయ్ సాంగ్, దయ్ హేలు కలిసి పెద్ద బంగ్లాలో ఉంటారు. వీరికి ఇంట్లో మూన్ అనే పనిమనిషి ఉంటుంది. ఈ కథను మలుపు తిప్పే పాత్ర ఈమెదే. ఈ చిత్రంలో కనిపించే మూడో కీలక పాత్ర ఈమెదే. ఇంకొకరు ఎవరనేది తొలి సగం చివరిలో తెలుస్తుంది. ఇక కథలోకి వెళ్తే..
పేదరికంలో కిమ్ ఫ్యామిలీ..
పారసైట్ అంటే తెలుగులో పరాన్న జీవి. అంటే ఇతరులపై ఆధారపడి బతికే జీవి అని అర్థం. ఇందులో పరాన్నజీవీగా కనిపించేది కిమ్ కుటుంబమే. ఈ కుటుంబలో ఎవరికీ ప్రత్యేకంగా ఉద్యోగాలు ఉండవు. కుటుంబమంతా కలిసి పిజ్జా బ్సాక్సుల ప్యాకింగ్ పనుల్లో ఉంటారు. వాటి ద్వారా వచ్చే నగదు వారి కుటుంబ పోషణకు సరిపోదు. అలాంటి సమయంలో.. కిమ్ కొడుకు కివెన్కు ఓ స్నేహితుడి ద్వారా డబ్బున్న ఓ కుటుంబంలో ఉద్యోగం పొందే అవకాశం లభిస్తుంది. అతడి ఫ్రెండ్ కెన్ విదేశాలకు వెళ్తూ.. పార్క్ కొడుకు, కూతురికి ఒక ట్యూటర్ కావాలని చెబుతాడు. కెవిన్కు యూనివర్శిటీ డిగ్రీ లేకపోవడంతో నకిలీ పత్రాలు సృష్టిస్తాడు.
ఇక్కడి నుంచే కథ ఆరంభం
ఇక్కడి నుంచే కథ ప్రారంభమవుతుంది. ఇంటి బెల్ కొట్టానే ఆ ఇంట్లో పనిమనిషిగా పనిచేస్తున్న మూన్ కెవిన్ను లోపలికి ఆహ్వానిస్తుంది. పార్క్ ఆ ఇంటిని కొనుగోలు చేయడానికి ముందు నుంచే మూన్ ఆ ఇంట్లో ఉంటుంది. పాత యజమాని ఇంట్లో పనిచేసిన మూన్కు ఆ ఇంటిలోని ప్రతి అంశం తెలియడంతో ఆమెనే పనిమనిషిగా కొనసాగిస్తారు. కెవిన్ ఇంట్లోకి ప్రవేశించిన తర్వాత మూన్.. అతడిని పార్క్ భార్య యోన్కు పరిచయం చేస్తుంది. ఈ సందర్భంగా యోన్ తన కొడుకు దయసాంగ్కు పెయిటింగ్స్ అంటే చాలా ఇష్టమంటూ గోడపై ఉన్న చిత్రాలను చూపిస్తుంది. దీంతో కెవిన్కు మెదడులో ఓ ఐడియా మెదులుతుంది. తనకు తెలిసిన ఒక ఆర్ట్ టీచర్ ఉన్నదని, ఆమెతో శిక్షణ ఇప్పిస్తే యోన్ పెద్ద పెయింటర్ అవుతాడని చెబుతాడు. అలా తన చెల్లి జెస్సికాను ఆర్ట్ టీచర్గా ఆమెకు పరిచయం చేస్తాడు. అయితే, వారిద్దరి అన్నా చెల్లెల్లనే సంగతి యోన్కు తెలియదు.
డ్రైవర్.. మూన్ల స్థానంలో కిమ్, అతడి భార్య
కెవిన్, జెస్సికాలు.. తమ తండ్రి కిమ్, తల్లి చంగ్లను కూడా ఆ ఇంట్లోకి రప్పించాలని ప్రయత్నిస్తారు. ఈ సందర్భంగా పార్క్ ఇంట్లో పనిచేస్తున్న డ్రైవర్ను, మూన్లను తప్పించేందుకు ఆసక్తికరమైన ప్లాన్లు వేస్తారు (ఈ సీన్లు సినిమాలో భలే థ్రిల్గా ఉంటాయి). డ్రైవర్ స్థానంలో కిమ్, పని మనిషి మూన్ స్థానంలో చంగ్లు చేరుతారు. ఆ ఇంట్లో వేర్వేరు పనుల్లో స్థిరపడిన తర్వాత.. పార్క్ కుటుంబం హాలీడేస్ ఎంజాయ్ చేయడానికి విదేశాలకు వెళ్తారు. అక్కడి నుంచి కథ మరో మలుపు తిరుగుతుంది.
మూన్ రాకతో ట్విస్ట్..
పార్క్ కుటుంబం ఇంట్లో లేకపోవడంతో కిమ్ ఫ్యామిలీ ఆ ఇంట్లో సంతోషంగా జీవితాన్ని వెల్లదిస్తారు. అయితే, కిమ్ మాత్రం అతడికి ఆ ఇంట్లో దనవంతుల వాసన వస్తుందని, అది తనకు అస్సలు నచ్చడం లేదని మొదటి నుంచి చెబుతూ వస్తుంటాడు. ఈ సినిమాలో ఈ ‘స్మెల్’ కూడా కీలకమైనదే. దాని గురించి తెలుసుకొనే ముందు.. ఈ సినిమాలో కీలకమైన ఈ సీన్ గురించి తెలియాల్సిందే. కాలింగ్ బెల్ కొట్టిన మూన్ను చూసి కిమ్ ఫ్యామిలీ షాకవుతారు. ఎందుకు వచ్చావని ప్రశ్నిస్తే.. తాను కొన్ని వస్తువులను మరిచిపోయానని, వెళ్లేప్పుడు అవి తీసుకెళ్తానని చెబుతుంది. ఆ తర్వాత ఆ ఇంట్లో బేస్మెంట్లోకి వెళ్తుంది. చాలాసేపు ఆమె అందులోనూ ఉండటంతో కిమ్ ఫ్యామిలీకి అనుమానం వస్తుంది.
బేస్మెంట్లో ఏముంది?
మూన్ రీ ఎంట్రీ వరకు అది సాధారణ పాత్రే అనిపిస్తుంది. అయితే, ఈ సీన్ తర్వాత తప్పకుండా ప్రేక్షకుడి మైండ్ బ్లాకవుతుంది. ఎందుకంటే.. ఆ బెస్మెంట్లో ఉండే ఒక బంకర్లో ఆమె భర్త దాక్కుని ఉంటాడు. బయట అప్పులవాళ్ల బాధ భరించలేక మూన్ భర్త.. పాత యజమానులు ఇంటిని ఖాళీ చేసి, మరమ్మతులు చేస్తున్న సమయంలో రహస్యంగా ప్రవేసిస్తాడు. అప్పటి నుంచి మూన్ యజమానులకు తెలియకుండా అతడికి ఆహారం అందిస్తూ ఉంటుంది. కిమ్ కుటుంబం వల్ల ఆమె ఇంటి నుంచి వెళ్లిపోవడంతో భర్తకు ఆహారం అందందు. దీంతో పార్క్ కుటుంబం ఇంట్లో లేని సమయంలో అక్కడికి వచ్చి భర్తకు ఆహారం పెడుతుంది. ఈ విషయం కిమ్ కుటుంబానికి తెలుస్తుంది. అదే సమయంలో ఆ ఇంట్లో ఉంటున్న ఆ నలుగురు ఒకే కుటుంబం అనే రహస్య మూన్కు కూడా తెలుస్తుంది. ఈ సందర్భంగా కొన్ని నాటకీయ పరిణామాలు చోటుచేసుకుంటాయి.
మూన్ హత్యతో మరో ట్విస్ట్..
కిమ్ కుటుంబం మూన్పై తిరగబడుతుంది. ఈ సందర్భంగా మూన్, ఆమె భర్తను తీవ్రంగా కొట్టి బంకర్లో బందిస్తారు. ఈ సందర్భంగా తలకు బలమైన గాయమై మూన్ బంకర్లోనే చనిపోతుంది. ఈ విషయం కిమ్ కుటుంబానికి తెలీదు. కానీ, వీరికి మరో రెండు షాకింగ్ విషయాలు తెలుస్తాయి. వాటిలో ఒకటి.. హాలీడేస్కు వెళ్లిన పార్క్ కుటుంబం టూర్ రద్దు చేసుకుని ఇంటికి తిరిగి వస్తున్నామని చెబుతారు. రెండోది.. వరదల్లో కిమ్ ఇల్లు పూర్తిగా మునిగిపోతుంది. దీంతో ఆ నలుగురు పార్క్ ఇంట్లోనే ఉండిపోవల్సి వస్తుంది. నలుగురు ఒకే చోట ఉంటే పార్క్కు అనుమానం వస్తుందనే ఆందోళన వారిలో ఉంటుంది. అదే సమయంలో బంకర్లో ఉన్న మూన్ భర్త.. బయటకు వస్తాడు. మూన్ మరణానికి పగ తీర్చుకోవడం కోసం కిమ్ కుటుంబంపై దాడి చేస్తాడు. మరో వైపు పార్క్ ఇంట్లో కొడుకు పుట్టిన రోజు వేడుకలు జరుగుతుంటాయి.
కెవిన్పై దాడి, జెస్సికా హత్య
మూన్ భర్త ఇనుప రాడ్తో కెవిన్ తల పగలగొడతాడు. ఆ తర్వాత కత్తితో జెస్సికా గుండెల్లో పొడుస్తాడు. దీంతో కిమ్ ఆమెను పట్టుకుంటాడు. కిమ్ భార్య మరో కత్తితో మూన్ భర్తను పొడిచి చంపేస్తుంది. ఇందతా చూసిన పార్క్ అక్కడికి రాగానే కిమ్లో ఉన్మాది మేల్కొంటాడు. ధనవంతుల వద్ద వచ్చే ఆ వాసన నచ్చదంటూ పార్క్ను కత్తితో పొడిచి పారిపోతాడు. అలా.. మూన్, ఆమె భర్త, జెస్సికా, పార్క్లు చనిపోతారు. హాస్పిటల్లో గాయాల నుంచి కోలుకున్న కెవిన్ కోర్టులు చుట్టూ తిరుగుతాడు. కెవిన్.. గతంలో మూన్ భర్త ఉన్న బంకర్లోకి వెళ్లి దాక్కుంటాడు. పోలీసులు కిమ్ ఆచూకీ తెలుసుకొనేందుకు కెవిన్, అతడి తల్లిపై నిఘా ఉంచుతారు. ఈ సందర్భంగా కిమ్ ఒక కోడ్ భాషలో (సినిమా ప్రారంభంలో ఈ కోడ్ భాషను చూపిస్తారు) కెవిన్కు సమాచారం. ఇస్తాడు, తాను బంకరులో క్షేమంగా ఉన్నానని తెలుపుతాడు.
ధనవంతుడిగా కెవిన్.. కట్ చేస్తే..
కొద్ది రోజుల తర్వాత కెవిన్ బోలెడంత డబ్బు సంపాదించి ధనవంతుడుగా మారతాడు. ఒక ఇల్లు కొనుగోలు చేస్తాడు. తన తండ్రిని మళ్లీ కలుసుకుంటాడు. ఇంతటితో కథ సుఖాంతమైందని ఊహించేలోపే మరో ట్విస్ట్ ఇస్తాడు. అదంతా కలేనంటూ.. చీకట్లో కుర్చున్న కెవిన్ను చూపిస్తాడు. ప్రారంభలో ఏ షాట్తో మొదలలువుతుందో అదే షాట్తో ముగుస్తుంది. అయితే, ప్రారంభంలో కెవిన్ పేదరికంలో ఉన్నా సంతోషంగా కనిపిస్తాడు. చివరి షాట్లో చీకట్లో దిగాలుగా కుర్చొని ఉంటాడు. ఈ సినిమాలో అంతర్లీనంగా ఉండే కొన్ని సన్నివేశాలు గుండెను హత్తుకుంటాయి. త్రివిక్రమ్ సినిమాల్లో చూపించినట్లుగా కొన్ని ఎలిమెంట్స్ ఉంటాయి. వాటిని అర్థం చేసుకుంటే దర్శకుడి ప్రతిభ మరింత అద్భుతంగా అనిపిస్తుంది.
ఈ సినిమాను పపిన్ సిస్టర్ ఇద్దరు పనిమనుషుల జీవితంలో జరిగిన వాస్తవ సంఘటనల ఆధారంగా తెరకెక్కించారు. ఈ సినిమాలో ఎలిమెంట్స్ గురించి మాట్లాడుకొంటే.. ధనవంతుడైన పార్క్ ఎత్తైన ఇంట్లో ఉన్నట్లు. అతడి ఇంటికి వెళ్లాలంటే పైకి వెళ్లడం, మెట్లు ఎక్కాలి. అలాగే కిమ్ కుటుంబం అండర్ గ్రౌండ్ లాంటి ఇళ్లలో ఉన్నట్లు చూపించాడు. వీరి ఇంటికి వెళ్లాలంటే ఎప్పుడూ మెట్లు దిగాల్సి ఉంటుంది. అలాగే మూన్ కూడా తన భర్తను కలిసేందుకు బేస్మెంట్ మెట్లను దిగాల్సి ఉంటుంది. అంటే.. ఈ సినిమాలను మనకు తెలియకుండా ‘మెట్లు’ కూడా ఒక సందేశాన్ని ఇస్తుంది. అయితే, దీన్ని సందేశాత్మక చిత్రం అనుకుంటే పొరపాటే. ఇందులో అన్ని కోణాలు ఉంటాయి. పేదరికం.. నిరుద్యోగం.. పేద-ధనికుల మధ్య ఉండే వ్యత్యాసం.. పేదరికం చేయించే నేరాలు.. ఇలాంటి సీన్లు వాస్తవ ప్రపంచాన్ని చూపిస్తాయి. ఈ సినిమాను కథలో తెలుసుకోవడం కంటే.. చూస్తేనే కిక్కు ఉంటుంది. ఇంత మంచి సినిమాను బోర్ కొట్టకుండా థ్రిల్లింగ్గా తెరకెక్కించిన దర్శకుడు బాంగ్ జూన్ హోకు ‘టేక్ ఏ బోవ్’. (Also Read: షూటింగులో నటిని ఆవహించిన దెయ్యం.. బాలీవుడ్ను వణికిస్తున్న ‘ముఖేష్ మిల్స్’)
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.