ఎంపీలకు మహిళల దుస్తులేసి ఊరేగించిన ప్రజలు.. హామీలు నెరవేర్చనందుకు శిక్ష

రాజకీయ పార్టీల నేతలు ప్రజలకు తప్పుడు హామీలిచ్చి అధికారంలోకి రావడం సాధారణమే. ముఖ్యం మన దేశంలో కాస్త డబ్బు, మంది బలం ఉంటే చాలు ఎంపీలు, ఎమ్మేల్యేలుగా అధికారంలోకి వస్తారు. ఐదేళ్లలో ఆస్తులను కూడగట్టి.. లగ్జరీ లైఫ్ అనుభవిస్తారు. నాలుగేళ్లు టైంపాస్ చేసి.. ఎన్నికల సమీపించగానే హామీలు అమలు చేస్తున్నట్లు బిల్డప్ ఇచ్చి మళ్లీ అధికారంలోకి వస్తారు.

అలాంటి నేతలను సాధారణ ప్రజలు ఏమీ చేయలేరు. ఒక వేళ ఎవరైనా ప్రశ్నించడానికి ప్రయత్నిస్తే.. బెదిరింపులకు పాల్పడతారు. కానీ, అక్కడ మాత్రం అలా కాదు. ఎన్నికల్లో ఇచ్చిన హామీలు తూ.చ. తప్పకుండా అమలు చేయాల్సిందే. లేకపోతే.. ప్రజలే నేతలను వీధుల్లోకి లాగుతారు. మహిళల దుస్తులేసి ఊరేగిస్తారు. లేదా గుండు కొట్టి ఊరంతా తిప్పుతారు.

దక్షిణ మెక్సికోకు చెందిన ఎంపీలు జేవియర్ జిమెనెజ్, లూయిస్ టన్‌‌లు ఎన్నికల్లో ఇచ్చిన హామీలు నెరవేర్చలేదు. దీంతో స్థానిక ప్రజలు వారికి మహిళ దుస్తులు వేసి ఊరేగించారు. జేబియర్‌కు నల్ల రంగు స్కర్ట్, తెల్ల టాప్ వేయగా, లూయిస్ టన్‌కు గులాబీ రంగు గౌను వేశారు. వారిని నగర వీధుల్లో తిప్పుతూ వాహనదారులు, పాదచారుల వద్ద బిచ్చమెత్తించారు. వారి వెనకాలే ర్యాలీగా వచ్చిన ప్రజలు.. ఈ నేతలు ఎన్నికల హామీలు నెరవేర్చలేదంటూ ప్లకార్డులను ప్రదర్శించారు.
‘ఎల్ డియారియో డి మెక్సికో’ అనే స్థానిక వార్తా పత్రిక కథనం ప్రకారం.. మేయర్ పదవి అనుభవిస్తున్న జిమెనెజ్, మున్సిపాలిటీలో మరో పదవిలో లూయిస్ టన్‌లు గత ఎన్నికల్లో నీటి సరఫరా వ్యవస్థను మెరుగుపరుస్తానని హామీ ఇచ్చారు. ఇందుకు రూ.1,08,32,651 కోట్లు కేటాయిస్తామని ప్రకటించారు. వారు ఆ హామీ నెరవేర్చకపోగా.. నిధులు కాజేశాడనే ఆరోపణలు వచ్చాయి. అదే రోజువైతే వారికి గుండు కొట్టిస్తామని ప్రజలు వెల్లడించారు. స్థానికులు ఆ ఇద్దరు నేతలను సుమారు 4 రోజులు నిర్భందించారు. పోలీసుల జోక్యంతో వారిని వదిలిపెట్టారు. మన ప్రజలు కూడా ఇలాగే తిరగబడితే.. ఎంత మంది రాజకీయ నేతలు ఇలా రోడ్డున పడి బిచ్చమెత్తాల్సి ఉంటుందో కదూ!!