ఆ భవనం నిర్మాణానికి 137 ఏళ్ల తర్వాత అనుమతి.. వ్యయం రూ.2937 కోట్లు

ఒక భవనం నిర్మాణానికి అనుమతి కావాలంటే ఎంత సమయం పడుతుంది? మూడు నెలలు లేదా ఏడాది సమయం. అది అక్రమ కట్టడమైతే ఏడాది నుంచి సుమారు ఎనిమిదేళ్ల సమయం పట్టినా పట్టొచ్చు. లేదా పూర్తిగా కూలగొట్టవచ్చు. అయితే, స్పెయిన్‌లోని బర్సెలోనాలో నిర్మిస్తు్న్న అతి పెద్ద చర్చి లా సగ్రదా ఫ్యామిలియా భవనానికి 137 ఏళ్ల తర్వాత అనుమతి లభించింది.

1882లో ఈ భవన నిర్మాణ పనులు మొదలయ్యాయి. అయితే, దీన్ని అనధికారికంగా నిర్మిస్తున్నారనే కారణంతో భవన నిర్మాణాలను మధ్యలోనే నిలిపేశారు. అప్పటికే భవనం సగానికి పైగా పూర్తి కావడంతో అధికారులు దాన్ని కూలగొట్టలేదు. భక్తులు ప్రార్థనలు చేసుకోడానికి తాత్కాలికంగా అనుమతి ఇచ్చారు. దీంతో ఆ భవనం క్రమేనా పర్యాటక ప్రాంతంగా మారిపోయింది. ఈ చర్చిని చూసేందుకు ఏటా లక్షలాది మంది పర్యాటకులు విచ్చేస్తున్నారు. 2005లో యునెస్కో ఈ భవనాన్ని ప్రపంచ వారసత్వ సంపదగా గుర్తించడం గమనార్హం.
ఎట్టకేలకు ప్రభుత్వం నుంచి అనుమతి లభించిన నేపథ్యంలో మధ్యలో నిలిపేసిన పనులను త్వరలోనే ప్రారంభించనున్నారు. 2026 కల్లా మొత్తం నిర్మాణం పూర్తవుతుందని అంచనా. ఈ చర్చి డిజైనర్ ఆంటోనీ గౌడీ 100వ వర్ధంతి సందర్భంగా దీన్ని ప్రారంభించాలని భావిస్తున్నారు. అయితే, ఇది సాదాసీదా భవనం కాదు. ఇందులో ప్రతి అణువు కళాత్మకమే. ఈ చర్చ్‌లో ఒక్కసారి అడుగు పెడితే ప్రపంచాన్నే మరిచిపోతారు. ఈ చర్చి ఎత్తు 172 మీటర్ల ఎత్తైన ఈ భవన నిర్మాణానికి 374 మిలియన్ యూరోలు (రూ.2937.58 కోట్లు) వెచ్చిస్తున్నారు.