viral: కిలీపాల్‌కి తీవ్ర గాయాలు.. కత్తితో ఐదుగురు వ్యక్తుల దాడి

కిలీపాల్ (Kili Paul).. ఇప్పుడీ పేరు ప్రపంచ సంచలనం. ఆఫ్రికాలో పేద దేశమైన టాంజానియా (Tanzania)కి చెందిన ఈ కుర్రాడు స్వతహాగా డాన్సర్. క్రమంగా తనలోని టాలెంట్‌ను ప్రపంచానికి చాటుతూ... వైరల్ సెన్సేషన్, ఇన్‌స్టాగ్రామ్ ఇన్‌ఫ్లూయెన్సర్ అయ్యాడు. ముఖ్యంగా భారతీయుల పాటలు, డైలాగ్స్‌కి లిప్ సింక్ ఇవ్వడం, డాన్స్ చెయ్యడం ద్వారా... ఇండియన్స్‌కి దగ్గరయ్యాడు. అతని అభిమానుల్లో భారతీయులే ఎక్కువ మంది ఉన్నారు. అలాంటి కిలీపాల్‌ని దుండగులు టార్గెట్ చేశారు. అతని ఎదుగుదలను భరించలేక దాడికి దిగారు. (Kili Paul Attacked)

"ఐదుగురు వ్యక్తులు నాపై దాడి చేశారు. వాళ్లను ఎదుర్కునేందుకు ప్రయత్నించాను. ఆ క్రమంలో నా కుడి చెయ్యి బొటనవేలికి కత్తి గాయం అయ్యింది. ఐదు కుట్లు పడ్డాయి. నన్ను కర్రలు, ముళ్ల కంచెలతో కొట్టారు. దేవుడి దయవల్ల నేను వాళ్లను ఎదుర్కొని ఇద్దర్ని కొట్టగలిగాను. దాంతో ఐదుగురూ పారిపోయారు. అప్పటికే నాకు గాయాలయ్యాయి. నా కోసం ప్రార్థించండి. ఇది భయానకం" అని 26 ఏళ్ల కిలీపాల్ తెలిపాడు. అతని బొటనవేలుకే కాదు... కాళ్లకు కూడా గాయాలయ్యాయి.

కిలీపాల్ ఎదుగుదలను భరించలేకే ఈ దాడి చేసినట్లు కనిపిస్తోంది. ఒంటిమీద కప్పుకునేందుకు బట్టలు కూడా లేనంత పేద కుటుంబం కిలీపాల్‌ది. అతని సోదరి నీమా పాల్ కూడా తరచూ అన్నయ్యతో కలిసి భారతీయ పాటలకు లిప్ సింక్ ఇస్తూ ఉంటుంది. ఇలా వీళ్లిద్దరూ సెలబ్రిటీలుగా మారారు. ప్రస్తుతం కిలీపాల్‌కి ఇన్‌స్టాగ్రామ్‌లో 36 లక్షల మంది ఫాలోయర్స్ ఉన్నారు. అలాగే యూట్యూబ్‌లో 9వేల మంది ఉన్నారు. తన టాలెంట్‌తోనే అతను అభిమానుల హృదయాలు గెలుచుకుంటున్నాడు. కానీ ఇది గిట్టని వాళ్లు దాడి చేసినట్లు తెలుస్తోంది.


ఫిబ్రవరిలో టాంజానియాలోని భారత హైకమిషన్... కిలీపాల్, నీమాపాల్‌ని సత్కరించింది. అంతకుముందు మన్‌కీబాత్ 86వ ఎపిసోడ్‌లో ప్రధానమంత్రి నరేంద్ర మోదీ... కిలీపాల్‌ని మెచ్చుకున్నారు. అతన్ని చూసి ప్రేరణ పొందమని భారతీయులను కోరారు. ఆ తర్వాత కిలీపాల్ కూడా ప్రధాని నరేంద్ర మోదీకి ధన్యవాదాలు చెబుతూ... ఇన్‌స్టాగ్రామ్ పోస్ట్ షేర్ చేశాడు. మోదీ తనను మెచ్చుకోవడం లక్షల సార్లు ప్రేరణ కలిగిస్తుందని తెలిపాడు.

టాంజానియా లాంటి పేద దేశం నుంచి ఓ వ్యక్తి ఎదుగుతుంటే అతన్ని తొక్కేయాలనే కుట్ర జరుగుతుండటం విషాదకరమే. కిలీపాల్ ఎదిగితే ఆ దేశానికే మంచిది. అతన్ని బ్రాండ్ అంబాసిడర్‌గా చేసుకొని ఆ దేశం విదేశీ పర్యాటకుల్ని ఆకర్షించవచ్చు. తద్వారా విదేశీ ఆదాయం భారీగా సంపాదించవచ్చు. అలాంటివేవీ జరగట్లేదు గానీ ఇలాంటి దారుణాలు మాత్రం జరుగుతున్నాయి.