దుస్తులను మడతపెట్టే రోబో.. 12 ఏళ్ల చిన్నారి సరికొత్త ఆవిష్కరణ

దుస్తులను వాషింగ్ మెషీన్లో వేసి ఎలాగోలా ఉతికేస్తాం. కానీ, ఆ తర్వాత వాటిని మడత పెట్టి అల్మారాలో పెట్టాలంటేనే కష్టం. దీంతో చాలామంది వాటిని ఇస్త్రీకి చేసేవారికి ఇచ్చేస్తుంటారు. అయితే, ఆ అవసరం లేకుండా 12 ఏళ్ల నైజీరియా బాలిక ఫాతిమా అద్భుల్లాహీ సరికొత్త రోబోట్‌ను కనిపెట్టింది. అందులో బట్టలు పెట్టి వదిలేస్తే చాలు.. అదే మడత పెట్టేస్తుంది.

ఈ రోబోట్ మూడు సెకన్ల వ్యవధిలో ఒక వస్త్రాన్ని మడగ పెట్టేయగలదు. ఈ సందర్భంగా ఫాతిమా మాట్లాడుతూ.. ‘‘ఇది టీషర్ట్ ఫోల్డర్. శనివారం, ఆదివారం రాగానే చాలా దుస్తులను మడత పెట్టాల్సి వస్తోంది. దీంతో ఈ రోబోట్‌ను తయారు చేశాను. కొన్ని పిన్, బీమ్, ఈవీ3 బ్రిక్‌లు ఉపయోగించి దీన్ని రూపొందించాను’’ అని తెలిపింది. అమెరికాలో దుస్తులు మడతపెట్టే యంత్రాల విలువ వెయ్యి డాలర్లు ఉంటుంది. భారత కరెన్సీలో రూ.68,560. అయితే, అంతకంటే తక్కువ ధరలోనే ఈ రోబోట్‌ను తయారు చేశానని ఫాతిమా చెబుతోంది.

దీని మీద ఎన్నో సందేహాలు మీకు ఉండొచ్చు. చీరలు, పెద్ద వస్త్రాలను ఎలా మడత పెట్టగలదనే ప్రశ్నలు మదిలో మెదలవచ్చు. ప్రస్తుతం ఆమె తయారు చేసింది టీషర్ట్ ఫోల్డర్ మాత్రమే. ఆమె 12 ఏళ్లకే ఇలాంటి రోబోట్ కనిపెట్టిందంటే.. మున్ముందు ఎన్ని అద్భుతాలు సృష్టించగలదో అర్థం చేసుకోవచ్చు. కాబట్టి.. ఆమెకు ఆల్ ది బెస్ట్ చెప్పేద్దామా.

రోబోట్ పనితీరును ఈ వీడియోలో చూడండి: