సిగరెట్ మానితే.. 6 రోజులు అదనపు సెలవులు, ఉద్యోగులకు బంపర్ ఆఫర్!

‘‘మీకు సిగరెట్ అలవాటు ఉందా? అయితే, మీకు ఈ ఆఫర్ వర్తించడం కష్టమే. ఒకవేళ మీరు ఆ అలవాటును వదిలించుకుంటే.. ఏడాదిలో ఆరు రోజులు అదనపు సెలవులను ఎంజాయ్ చేయొచ్చు’’ అంటూ ఆ కంపెనీ తమ ఉద్యోగులకు బంపర్ ఆఫర్ ఇచ్చింది. స్మోకింగ్ చేసే ఉద్యోగులకు జరిమానాలను విధించడానికి బదులుగా.. ఆ అలవాటు మానేవారికి సరికొత్త సదుపాయం కల్పిస్తోంది.

టోక్యోలోని ‘పియాలా ఐఎన్‌సీ’ అనే మార్కెటింగ్ సంస్థ ఈ ఆఫర్‌ను తన ఉద్యోగుల ముందు ఉంచింది. అయితే, ఇందుకు బలమైన కారణం కూడా ఉంది. ఈ సంస్థ కార్యాలయం 29వ అంతస్థులో ఉంది. ఈ భవనం లోపల స్మోకింగ్ చేయడానికి ఎవరికీ అనుమతి లేదు. దీంతో ఉద్యోగులంతా కిందికెళ్లి సిగరెట్ తాగుతున్నారు. దీనిపై ఓ ఉద్యోగి.. తమ యజమాన్యానికి ఫిర్యాదు చేశారు.

Also Read: టీ తాగనిదే.. ఈ గుర్రం కాలు కూడా కదపదు, ఇదిగో వీడియో!

‘‘ఉద్యోగులు కిందికి వెళ్లి సిగరెట్ తాగిరావడానికి సుమారు 15 నుంచి 20 నిమిషాల సమయం పడుతోంది. దీంతో విలువైన సమయం వృథా అవుతోంది. ఇలా సిగరెట్ తాగేందుకు వెళ్లేవారి వల్ల.. సిగరెట్ తాగని ఉద్యోగులపై పనిభారం పడుతోంది’’ అని ఆ ఉద్యోగి ఫిర్యాదులో పేర్కొన్నాడు. ఈ ఫిర్యాదు చూసిన సీఈవో.. అలాంటి ఉద్యోగులపై జరిమానా విధించేందుకు బదులు, ఏదైనా ప్రోత్సాహకాల ద్వారా అలవాటు మాన్పించాలని భావించారు.

Also Read: కుక్క నాకడంతో ప్రాణాలు కోల్పోయిన యజమాని.. ఘటనపై షాకింగ్ వాస్తవాలు!

ఈ సందర్భంగా ఆఫీసు సమయంలో స్మోకింగ్ చేయకుండా పనిచేసే సిబ్బందికి ఏడాదిలో అదనంగా ఆరు సెలవులు ఇస్తామని ప్రకటించారు. ఈ ఏడాది సెప్టెంబర్‌ నుంచి ఈ ఆఫర్ అందుబాటులోకి వచ్చింది. ఇప్పటికే కొంతమంది ఈ ఆఫర్‌ను సద్వినియోగం చేసుకోడానికి స్మోకింగ్‌కు దూరంగా ఉంటున్నారు. ఈ విషయంలో కంపెనీ తమ స్వార్థం గురించి ఆలోచించినా.. ఈ ఆఫర్ వల్ల ఉద్యోగుల ఆరోగ్యం కూడా మెరుగుపడుతుందనే ఆనందం ప్రతి ఒక్కరిలో నెలకొంది. మరి, దీనిపై మీరేమంటారు?