క్యాన్సిల్ చేసిన ఆహారం పేద పిల్లలకు.. డెలివరీ బాయ్ పెద్ద మనసు

ఇటీవల జొమాటాకు చెందిన ఓ వికలాంగ డెలవరీ బాయ్ మూడు చక్రాల సైకిల్‌పై ఫుడ్ డెలవరీ చేస్తున్న వీడియో వైరలైన సంగతి తెలిసిందే. తాజాగా కోల్‌కతాకు చెందిన మరో డెలవరీ బాయ్ పతిక్రిత్ సాహా పేద పిల్లల కడుపు నింపుతూ నెటిజన్ల ప్రశంసలు అందుకుంటున్నాడు. ‘రోల్ కాకు’గా పేరొందిన పతిక్రిత్.. జొమాటో ఫుడ్ యాప్‌లో కస్టమర్లు క్యాన్సిల్ చేసే ఆహారాన్ని పేద పిల్లలకు అందిస్తూ తనకు తోచిన సాయం చేస్తున్నాడు.

ఈ సందర్భంగా పతిక్రిత్ మాట్లాడుతూ.. ‘‘నాలుగేళ్ల కిందట కోల్‌కతాలోని డుమ్‌డుమ్ కంటోన్మెంట్ వీధుల్లో తిరుగుతున్నప్పుడు ఓ బాలుడు నా దగ్గరకు పరిగెట్టుకుంటూ వచ్చి కాళ్ల మీద బిక్షమడిగాడు. అయితే, డ్రగ్స్‌కు బానిసయ్యాడనే విషయం అర్థమైంది. డబ్బులిస్తే మళ్లీ డగ్స్ కొంటాడని తెలిసి ఇవ్వలేదు. అయితే, అతడు చాలా క్రూరంగా ప్రవర్తించాడు. దీంతో అతడి చెంప పగలగొట్టాను. అతడు నా ముందు కన్నీరుమున్నీరయ్యాడు. అక్కడి నుంచే నా కథ మొదలైంది’’ అని తెలిపాడు.
అప్పటి నుంచి ప్రతీక్ వారికి చదువు నేర్పడంతో పాటు, వారికి ఆదాయం సమకూర్చేందుకు జ్యూస్, వాటర్ బాటిల్ స్టాల్ ఏర్పాటుచేసి దాని బాధ్యతలు పిల్లలకు అప్పగించాడు. పేద పిల్లలకు సమయం కేటాయించేందుకు కోల్‌కతా మున్సిపల్ కార్పొరేషన్‌లో ఉద్యోగానికి రాజీనామా చేసి జొమాటాలో చేరానని పతిక్రిత్ తెలిపాడు. డెలవరీ బాయ్‌గా బాధ్యతలు స్వీకరించిన కొద్ది నెలల ముందు పతిక్రిత్ ఓ రెస్టారెంట్ యజమాని స్నేహితుడు అయ్యాడు. అతని హోటల్ నుంచి కస్టమర్లు బుక్ చేసుకున్న ఆహారాన్ని ఎవరైనా క్యాన్సిల్ చేస్తే.. దాన్ని తిరిగి హోటల్‌కు ఇవ్వకుండా పేద పిల్లలకు చేర్చేలా ఒప్పందం చేసుకున్నాడు. చూశారుగా.. ఒకరు క్యాన్సిల్ చేసిన ఆహారంతో మరొకరి కడుపు నింపడం నిజంగా గ్రేట్ కదూ!