బీచ్‌లో ఇసుక సేకరించిన జంటకు ఆరేళ్ల జైలు శిక్ష!

ఆ జంట చేసిన తప్పు సముద్ర తీరంలో ఇసుకను బాటిళ్లలో వేసుకోవడమే. అదేంటీ.. బీచ్‌లో ఇసుక తీసుకున్నా నేరమేనా? అని ఆశ్చర్యపోతున్నారా? అక్కడ మాత్రం నేరమే. ఇటలీలోని సర్దినియా ప్రాంతానికి వెళ్లిన ఓ ఫ్రెంచ్ జంటకు ఎదురైన చేదు అనుభవం గురించి తెలిస్తే.. బీచ్‌లో ఇసుక ముట్టుకోవాలంటేనే భయపడిపోతారు.

సర్దినియా దీవిలోని తెల్ల ఇసుక తిన్నెలు భలే అందంగా ఉంటాయి. అయితే, ఆ ఇసుకను ఎవరైనా తీసుకెళ్లడానికి ప్రయత్నిస్తే పోలీసులు కటకటాల్లోకి తోస్తారు. ఎందుకంటే.. ఆ ఇసుకను ప్రభుత్వ ఆస్తిగా పరిగణిస్తారు. ఈ ఇసుకను ఎవరైనా తీసుకున్నా, అక్రమంగా తరలించి విక్రయించేందుకు ప్రయత్నించినా నేరమేనని, ఇందుకు భారీ జరిమానాలు విధిస్తామని ఇటలీ ప్రభుత్వం 2017లో నిబంధనలు విధించింది. ఇసుక, రాళ్లు, గవ్వల సేకరణపై ఆంక్షలు పెట్టింది. నిబంధనలు అతిక్రమిస్తే రూ.2.38 లక్షల జరిమానా విధిస్తామని పేర్కొంది. సర్దినియాలో ఏటా కొన్ని టన్నుల ఇసుక మాయమవుతోంది. ఫలితంగా దీవి తీవ్రంగా కోతకు గురవ్వుతోంది. పైగా విదేశీయులు ఇక్కడి తెల్ల ఇసుకను తరలించి ఆన్‌లైన్‌లో వేలానికి పెట్టి మరీ అమ్మేస్తున్నారు. దీంతో ప్రభుత్వం ఈ చట్టాన్ని అమల్లోకి తెచ్చింది.

Read also: చెన్నైలో వింత.. నీలి కాంతులు వెదజల్లిన సముద్ర అలలు, ఆ ముప్పు తప్పద్దా?

అయితే, ఈ నిబంధనలు గురించి తెలియని ఫ్రెంచ్ జంట.. సర్దినియా బీచ్‌లో ఇసుకను సేకరించారు. మార్గమధ్యలో పోలీసులు వారి కారులో తనిఖీలు చేపట్టగా 14 సీసాల్లో ఇసుక లభించింది. వాటిలో చైనా నుంచి సేకరించిన ఇసుక కూడా సీసాలు కూడా ఉన్నాయి. ఆ ఇసుక సీసాలను స్వాధీనం చేసుకున్న పోలీసులు ఆ జంటను అరెస్టు చేసి కోర్టుకు తరలించారు. కోర్టు వారికి ఆరేళ్ల జైలు శిక్ష విధించింది. తాము కావాలని ఆ ఇసుకను దొంగిలించలేదని, తమ పర్యాటనకు గుర్తుగా మాత్రమే సేకరించామని తెలిపారు.