కడుపు నిండా తినండి, సగం బిల్లు కట్టండి.. ఆ ప్రభుత్వ నిర్ణయం అదుర్స్!

కరోనా వల్ల పరిస్థితులు ఎలా మారిపోయాయో తెలిసిందే. ప్రజలు బయట ఆహారాన్ని పూర్తిగా మానేశారు. కొంతమంది మాత్రమే తప్పనిసరి పరిస్థితుల్లో హోటళ్లకు వెళ్లి తింటున్నారు. కొందరు ఆన్‌లైన్లో ఆర్డర్ చేసుకుంటున్నారు. ఒకప్పుడు రారాజులా వెలిగిపోయిన హోటల్ బిజినెస్ కరోనా వల్ల పూర్తిగా కుదేలైంది. లాక్‌డౌన్ తర్వాత రెస్టారెంట్లు తెరిచినా.. ఆశించిన స్థాయిలో వ్యాపారం జరగడం లేదు. దీంతో వ్యాపారులు డీలా పడుతున్నారు. ఈ నేపథ్యంలో ప్రభుత్వం ఓ కీలక నిర్ణయం తీసుకుంది. మీకు కావల్సినంత తిని.. 50 శాతం చెల్లించండని ప్రకటించింది. ఒక్క క్షణం.. ఈ ఆఫర్ ప్రకటించింది మన ప్రభుత్వం కాదండి, యూకే సర్కార్.

Also Read: ‘టిక్‌టాక్‌’కు చిక్కిన ఆ సూట్‌కేసులోని శవాలు వారివే, కానీ..

యూకేలో కూడా ఇటీవల లాక్‌డౌన్ నుంచి ప్రజలకు ఉపశమనం కలిగించింది. రెస్టారెంట్లు తెరిచేందుకు ప్రభుత్వం అనుమతి ఇచ్చింది. అయితే, వైరస్ భయంతో ప్రజలు బయటకు రావడం లేదు. ఫలితంగా హోటల్ బిజినెస్ ముందుకు సాగడంలేదు. దీనివల్ల యూకే ఆర్థిక పరిస్థితి గతి తప్పే ప్రమాదం ఉందని భావించిన ప్రభుత్వం. ప్రజలకు బంపర్ ఆఫర్ ప్రకటించింది. మీరు ఎంత తిన్నా సరే.. 50 శాతం బిల్లు చెల్లిస్తే చాలని తెలిపింది. ఈ ఆఫర్ ఆగస్టు వరకు ఉంటుందని తెలిపింది. సోమవారం నుంచి బుధవారం వరకు మాత్రమే ఇది వర్తిస్తుందని స్పష్టం చేసింది.

Also Read: అల్లుడి కోసం 67 వంటకాలు.. ఆంధ్ర అత్తకు నెటిజన్స్ జేజేలు!

బ్రిటన్ ఆర్థిక శాఖ మంత్రి రిషి సునాక్ ఇటీవల ప్రవేశపెట్టిన ‘మినీ బడ్జెట్’లో ఈ విషయాన్ని ప్రస్తావించారు. ‘ఈట్ అవుట్ టు హెల్ప్ అవుట్’ (Eat out to Help out) డిస్కౌంట్ కింద ప్రజలు ఈ ఆఫర్‌ను సద్వినియోగం చేసుకోవచ్చని తెలిపారు. ఆహారం, నాన్-ఆల్కహాలిక్ డ్రింకులకు ఈ ఆఫర్ వర్తిస్తుందని పేర్కొన్నారు. మద్యం సరఫరాపై ఎలాంటి ఆఫర్ లేదని పేర్కొన్నారు. తగిన నిబంధనలు పాటిస్తూ.. రెస్టారెంట్లలో ఆహారాన్ని ఎంజాయ్ చేయాలని తెలిపారు. ఈ ఐడియా ఏదో బాగుంది కదూ.