యాక్సిడెంట్ చేసి.. పోలీసుల ముందు యోగా చేసిన మహిళ!

ఓ మహిళ ట్రాఫిక్ నిబంధనలను ఉల్లంఘించడమే కాకుండా.. పోలీసులను ముప్పు తిప్పలు పెట్టింది. చివరికి విద్యుత్తు స్తంభాన్ని ఢీకొట్టి ప్రమాదానికి గురైంది. దీంతో ఆమెకు తీవ్ర గాయాలై ఉంటాయని పోలీసులు భావించారు. అయితే, ఆమె కారు నుంచి కిందికి దిగి.. యోగా భంగిమలు ప్రదర్శించడం చూసి ఆశ్చర్యపోయారు.

జెన్నీఫర్ రిస్చ్ (39) అనే మహిళ కాలిఫోర్నియాలోని విల్లిట్స్‌లో ట్రాఫిక్ ఉల్లంఘనకు పాల్పడింది. పాదచారులకు ప్రమాదం వాటిల్లేలా అత్యంత వేగంగా కారు నడిపింది. దీంతో పోలీసులు ఆమెను పట్టుకోడానికి వెంబడించారు. వారి నుంచి తప్పించుకోడానికి ఆమె మరింత వేగంగా కారు నడిపింది. చివరికి ఓ విద్యుత్ స్తంభాన్ని ఢీకొట్టింది. ఈ ప్రమాదంలో ఆమె తీవ్రంగా గాయపడి ఉంటుందని పోలీసులు తొలుత భావించారు. అయితే, ఆమె కారు నుంచి బయటకు వచ్చి యోగా భంగిమలు ప్రదర్శించింది. దీంతో పోలీసులకు నవ్వాలో ఏడ్వాలో తెలియలేదు. చివరికి ఆమెను అరెస్టు చేసి మెండిసినో కౌంటీ జైలుకు తరలించి, 35 వేల పౌండ్ల (రూ.30,32,977) పూచీ కత్తుపై బెయిల్ మంజురు చేశారు.