(image credit - instagram)
కఠినమైన గ్రహశకల వజ్రాలు
మనం ఓ కాగితాన్ని మడతలు పెడుతూ పోతే... 8 మడతల తర్వాత ఇక దాన్ని మడత పెట్టడం మన వల్ల కాదు. అప్పటికే ఆ కాగితం అత్యంత గట్టిగా మడతలు పడివుంటుంది. అప్పటికే మనం దానిపై ఎంతో ఒత్తిడి చూపిస్తాం. సాధారణ వజ్రాలపై కూడా ఇలా విపరీతమైన ఒత్తిడి పడుతుంది. అందువల్లే అవి గట్టిగా అయిపోతాయి. మరి వాటికే అంత గట్టిదనం ఉంటే... ఎక్కడో అంతరిక్షం నుంచి వేగంగా దూసుకొచ్చే రాయి బలంగా గ్రాఫైట్‌ని ఢీకొంటే... ఎంత ఒత్తిడి ఉంటుంది. ఆ ఒత్తిడిలో ఏర్పడే వజ్రం ఇంకెంత గట్టిగా ఉంటుందో ఊహించుకోండి. ఇలాంటి వజ్రాలు ఈ భూమిపై 50 వేల ఏళ్ల కిందట తయారయ్యాయి.
(symbolic image credit - instagram)
గ్రహశకల వజ్రాలకు ప్రత్యేక గుణాలు
గ్రహశకలాలు ఢీకొట్టినప్పుడు ఏర్పడే వజ్రాలకు అసాధారణ లక్షణాలు ఉంటున్నాయని ఓ కొత్త అధ్యయనం ద్వారా తెలిసింది. ఈ వజ్రాలతో అత్యంత కఠినమైన వస్తువుల్ని తయారుచెయ్యవచ్చు అని తెలిసింది. బ్రిటన్, అమెరికా, హంగేరీ, ఇటలీ, ఫ్రాన్స్‌ కి చెందిన సైంటిస్టులు 1891లో అరిజోనా ఎడారి (Arizona desert)లో లభించిన లోన్స్‌డలీట్ (lonsdaleite) ఖనిజాన్ని పరిశీలించారు. నిజానికి ఇది ఆరు కోణాలు (hexagonal diamond) కలిగిన స్వచ్ఛమైన వజ్రం. ఇది క్యూబ్ ఆకారంలో ఉండే సంప్రదాయ వజ్రాల కంటే భిన్నమైనది అని గుర్తించారు. ఇది గ్రహశకలం ఢీకొట్టడం వల్ల ఏర్పడింది.
(symbolic image credit - instagram)
లోన్స్‌డలీట్ కి ప్రత్యేక లక్షణాలు
లోన్స్‌డలీట్ వజ్రంలో కొంతవరకూ డైమండ్ లాగా ఉండగా... మరికొంత గ్రాఫేన్ లాగా ఉంది. అంటే గ్రాఫేన్ కూడా ఈ వజ్రంలో కలిసిపోయింది. ఈ రెండు లోహాలూ కలిసిపోయి.. ఒకే లోహంగా మారాయి. అందువల్ల దీన్ని డయాఫైట్స్ (diaphites) అని పిలిచారు. లోన్స్‌డలీట్ వజ్రంలో డైమండ్, గ్రాఫేన్ అణువులను కార్బన్ అణువులు కలుపుతూ వచ్చాయి. అందువల్ల ఈ వజ్రంలో గ్రాఫైట్ నిర్మాణ ఆకృతి ఉంది. ఈ కారణంగా ఇది సాధారణ వజ్రాల్లా తెల్లగా కాకుండా నల్లగా మెరుస్తోంది. ఇది శాస్త్రవేత్తల్ని ఆశ్చర్యపరిచింది. మొత్తంగా ఏం తేల్చారంటే... ఈ వజ్రం దొరికిన ప్రదేశంలో.. ఇలాంటి మరిన్ని వజ్రాలు ఉండే అవకాశం ఉందని తేల్చారు.
(symbolic image credit - instagram)
గ్రహశకల వజ్రాలతో ప్రయోజనాలు
సంప్రదాయ వజ్రాల కంటే గ్రహశకల డైమండ్లతో కొన్ని అదనపు ప్రయోజనాలు ఉన్నాయని పరిశోధకులు చెబుతున్నారు. అత్యంత గట్టిగా ఉండే అల్ట్రా-హార్డ్ మెటీరియల్‌ని ఈ వజ్రాలతో తయారుచేయవచ్చు అంటున్నారు. అలాగే అత్యంత బాగా సాగే గుణం ఉన్న వాటిని కూడా తయారుచెయ్యవచ్చు అంటున్నారు. కండక్టర్ మొదలుకొని ఇన్సులేటర్ వరకూ... చాలా ఎలక్ట్రిక్ పరికరాల్లో ఎలక్ట్రానిక్ ప్రాపర్టీస్‌ని ఈ వజ్రాల ద్వారా కావాల్సిన విధంగా మార్పులు చేయవచ్చని అంటున్నారు. అంటే... ఎలక్ట్రానిక్స్, నానో మెడిసిన్, లేజర్ టెక్నాలజీలో కొన్ని విప్లవాత్మక మార్పులు తెచ్చేందుకు ఈ గ్రహశకల వజ్రాలు ఉపయోగపడతాయి అని శాస్త్రవేత్తలు చెబుతున్నారు. అంతా బాగానే ఉన్నా... ఇలాంటి వజ్రాలు అత్యంత అరుదుగా ఉండటమే సమస్య. ప్రస్తుత భూమిని గ్రహశకలాలు ఢీకొట్టట్లేదు కాబట్టి... ఇదివరకు జరిగిన ఘటనల్లో ఏర్పడిన వజ్రాలతోనే ఏదైనా చెయ్యాల్సి ఉంటుంది. కానీ వాటిని సేకరించడం ఈ రోజుల్లో చాలా కష్టమవుతోంది. దీనిపై ప్రపంచ దేశాలు ఫోకస్ పెట్టాల్సి ఉంటుంది. శాస్త్రవేత్తలు మాత్రం తమ వంతుగా కొత్త విషయాలు తెలుసుకుంటూ... కొత్త టెక్నాలజీవైపు అడుగులు వేయిస్తున్నారు.
(image credit - instagram)