ఆ కారును కొన్న హాలీవుడ్ నటుడు ప్రమాదంలో దుర్మరణం చెందాడు. దాని విడిభాగాలు కొన్న వ్యక్తులు సైతం ప్రమాదాల్లో చనిపోయారు. చివరికి.. ఆ కారు ఊహించని విధంగా అదృశ్యమైంది. చివరిగా ఆ కారును తరలిస్తున్న ట్రక్కు డ్రైవర్ను చంపేసింది. ఈ కారు కథ వింటే వెన్నులో వణుకు పుడుతుంది.
Samayam Telugu13 Aug 2020, 11:55 am
విజయ దేవరకొండ నటించిన ‘ట్యాక్సీవాలా’, నయనతార నటించిన ‘డోరా’ సినిమాల్లో ఆత్మలు ఆవహించిన కార్లను చూసే ఉంటారు. బాలీవుడ్ సినిమా ‘టార్జన్’లో కూడా కారును ఆత్మ ఆవహించడాన్ని చూపించారు. మరికొన్ని పాత చిత్రాల్లో కూడా ఆత్మలు కార్లను ఆవహించడం, మనుషుల సాయంతో ఆ కార్లు విలన్లను చంపడం వంటివి చూసే ఉంటారు. కానీ, ఓ కారు ఏకంగా హీరో ప్రాణాలనే తీసింది. రోడ్డు ప్రమాదంలో ధ్వంసమైనా సరే.. అది తన ఉనికిని చాటుతూ పలువురి మరణానికి కారణమైంది. ఆ కారుతో సంబంధం ఉన్న వ్యక్తులు ఏదో ఒక రూపంలో మరణించారు. ప్రాణాలతో బయటపడినా.. ప్రశాంతంగా లేరు. ఇది వినేందుకు, చదివేందుకు విడ్డూరంగానే ఉండవచ్చు. కానీ, ప్రపంచంలో అంతుచిక్కని మిస్టరీల్లో ఒకటిగా ఉన్న ఈ కారు హిస్టరీని తెలుసుకుంటే ముచ్చెమటలు పడతాయి. అంతేకాదు.. ఈ కారు స్ఫూర్తితోనే పైన చెప్పుకున్న సినిమాలు తెరకెక్కాయంటే తప్పకుండా ఆశ్చర్యపోతారు. ఇంతకీ ఆ కారు కథ ఏమిటీ? ఆ హీరోకు.. ఆ కారుకు ఉన్న సంబంధం ఏమిటి? అతడి మరణం తర్వాత ఆ కారు విడి భాగాలను కొనుగోలు చేసిన వ్యక్తులకు ఏమైందీ? ఈ ఇవన్నీ తెలుసుకొనే ముందు.. ఆ హీరో గురించి తెలుసుకోవాల్సిందే.
ఆ హీరో పేరు జేమ్స్ డీన్.. చిన్న వయస్సులోనే లక్షల్లో అభిమానులు
అతడి పేరు జేమ్స్ డీన్. హాలీవుడ్ యువ హీరో. సినిమాల్లోకి రాక ముందు టీవీ షోల ద్వారా పాపులారిటీ సంపాదించాడు. కానీ, 24 ఏళ్ల వయస్సులోనే ఘోర రోడ్డు ప్రమాదంలో చనిపోయాడు. కానీ అతడి అభిమానులు మాత్రం తమ హీరో ‘చంపివేయబడ్డాడు’ అని అంటారు. ఇందుకు కారణం.. అతడి మరణం తర్వాత జరిగిన అనుమానస్పద ఘటనలే. కాలిఫోర్నియాకు చెందిన ఈ యంగ్ యాక్టర్ చాలా చిన్న వయస్సులో అవకాశాలను అందిపుచ్చుకున్నాడు. 1954లో ఎంతో మంది అభిమానులను సంపాదించుకున్నాడు. ఫలితంగా అతడికి 1955లో ‘ఈస్ట్ ఆఫ్ ఈడెన్’ అనే సినిమాలో హీరోగా అవకాశం వచ్చింది. ఆ తర్వాత ‘రెబల్ వితౌట్ కాజ్’ అనే సినిమాలో నటించి మరింత మంది అభిమానులను సొంతం చేసుకున్నాడు. అతడి కెరీర్లో ఇదో ఉత్తమ చిత్రంగా నిలిచిపోయింది. ఆ తర్వాత డీన్ ‘జెయింట్’ అనే సినిమాలో నటించాడు. అతడి మరణం వల్ల ఈ సినిమా వాయిదా పడింది. 1956లో విడులైన ఈ సినిమాను చూసి చాలామంది భావోద్వేగానికి గురయ్యారు. ఆ హీరో అంతగా అభిమానుల మనసులో స్థానం సంపాదించుకున్నాడు.
కార్లంటే చాలా పిచ్చి..
డీన్కు కార్లంటే చాలా పిచ్చి. ముఖ్యంగా రేసు కార్లతో దూసుకెళ్లడమంటే డీన్కు మహా సరదా. 1955 మారచి నెలలో డీన్ పామ్ స్ప్రింగ్స్ రోడ్ రేసెస్ పోటీల్లో పాల్గొన్నాడు. ఆ తర్వాత కూడా మరికొన్ని పోటీల్లో పాల్గొని అభిమానులతో రియల్ హీరో అనిపించుకున్నాడు. అతడి వేగం అంటే ప్రాణం.. అందుకే జీవితంలో కూడా వేగంగా ఎదగాలనుకున్నాడు. కానీ, ఆ వేగమే అతడి ప్రాణం తీస్తుందని, 24 ఏళ్లకే జీవితం ముగుస్తోందని ఊహించలేకపోయాడు.
డీన్ జీవితానికి ముగింపు పలికిన కొత్త కారు
జేమ్స్ డీన్ తన ‘పోర్స్చే 356’ సూపర్ స్పీడ్ కారును వదిలి కొత్త సిల్వర్ ‘పోర్స్చే 550 స్పేడర్’ కారును కోనుగోలు చేశారు. ఆ కారుపై అతడు తన లక్కీ నెంబరు 130 స్టిక్కరింగ్ చేయింకున్నాడు. డీన్ స్నేహితుడు బిల్ హిక్మ్యాన్ సూచించిన ‘లిటిల్ బాస్టర్డ్’ అని పేరును ఆ కారుకు పెట్టాడు. అయితే, డీన్ కారు మీద ఉన్న 130 నెంబరు చూసి.. చాలామంది అది అంత మంచి సంఖ్య కాదని తెలిపేవారు. ఎందుకంటే.. చాలామంది ‘13’ సంఖ్యను అపశకునంగా భావిస్తారు. అయితే, 13 పక్కన సున్నా ఉండటం వల్ల ఎలాంటి ఇబ్బంది ఉండదని డీన్ తెలిపేవాడు. పైగా అలాంటి సంఖ్యలపై తనకు నమ్మకం లేదని స్పష్టం చేశాడు.
కొత్త కారులో లాంగ్ డ్రైవ్.. ఊహించని ప్రమాదం
అది సెప్టెంబరు 30, 1955న జేమ్స్ డీన్ తన మెకానిక్ రోల్ఫ్ ఉట్రైజ్తో కలిసి తన కొత్త కారును ట్రైల్ వేయడానికి లాంగ్ డ్రైవ్కు బయల్దేరారు. మధ్యాహ్నం సుమారు 3.30 గంటల సమయంలో పోలీసులు డీన్ కారును అడ్డగించారు. అతి వేగంగా వెళ్తున్నందుకు జరిమానా విధించారు. ఆ తర్వాత డీన్ తన ప్రయాణాన్ని కొనసాగించాడు. సాయంత్రం సుమారు 5.30 గంటల సమయంలో వెస్ట్బౌండ్ హైవే 466 మీదుగా వెళ్తుండగా.. ఫోర్డ్ ట్యూడర్ కారు ఢీకొట్టింది.
రెప్పపాటు వ్యవధిలో విధ్వంసం.. డీన్ దుర్మరణం
ఫోర్డ్ కారులో ఉన్న తుర్నూసీడ్ అనే డ్రైవర్ ఎడమ వైపు ఉన్న మలుపులోకి కారును తిప్పాడు. అదే సమయంలో డీన్ కారు వేగంగా అటుగా వచ్చింది. దీంతో తర్నూసీడ్ ఆ కారు.. డీన్ కారును ఢీకొట్టింది. రెప్పపాటు వ్యవధిలో డీన్ కారు గాల్లోకి లేచింది. అందులో ఉన్న రోల్ఫ్ కారు నుంచి బయట పడిపోయాడు. కానీ, డీన్ మాత్రం కారుతోనే గాల్లో గింగిర్లు కొట్టి పడిపోయాడు. తలకు బలమైన గాయం, శరీరం నుజ్జు కావడంతో డీన్ దుర్మరణం చెందాడు. రోల్ఫ్ తలకు బలమైన గాయమైంది. పక్కటెముకలు విరిగాయి. కానీ, తుర్నూసీడ్ స్వల్ప గాయాలతో తప్పించుకున్నాడు.
ఆగిపోయిన జీవితం.. మరణం తర్వాత అనుమానస్పద ఘటనలు
డీన్ జీవించి ఉంటే.. హలీవుడ్లో ప్రముఖ హీరోగా రాణించేవాడని అక్కడి సినీ పెద్దలు పేర్కొన్నారు. అతడు మరణం తర్వాత ప్రకటించిన అకాడమీ అవార్డుల్లో ‘ఈస్ట్ ఆఫ్ ఈడెన్’ సినిమాకు బెస్ట్ లీడింగ్ యాక్టర్ పురస్కారం లభించింది. కానీ, దాన్ని అందుకోడానికి డీన్ జీవించి లేడు. అయితే, డీన్ మరణం తర్వాత కూడా జీవించే ఉన్నాడని అతడి అభిమానులు నమ్మారు. దీనికి కారణం.. ఆ కారే. ఔను, ఆ కారు వల్ల డీన్ మాత్రమే కాదు.. దాని విడి భాగాలను వాడిన వ్యక్తులు కూడా ప్రమాదాల్లో చిక్కుకున్నారు.
డీన్ మరణంపై అనుమానాలు.. ఆ కారే చంపేసిందని వదంతులు
ఆ కారు నెంబరు డీన్ మరణానికి కారణమైందని, అది ఆత్మ ఆవహించిన కారనే వదంతులు వచ్చాయి. డీన్ మరణం తర్వాత చోటుచేసుకున్న కొన్ని ఘటనలు అది నిజమే అనిపించేలా చేశాయి. ప్రమాదం తర్వాత డీన్ ఆత్మ ఆ కారులోనే ఉండిపోయిందని అంతా భావించారు. ఈ కారు ఇంజిన్, టైర్లు, ఇతర విడి భాగాలను కొనుగోలు చేసి తమ వాహనాలకు అమర్చుకున్న వ్యక్తులు ప్రమాదాలకు గురై చనిపోవడం వల్ల ఆ కారులో ఆత్మ ఉందని జనాలు నమ్మడం మొదలుపెట్టారు.
యాక్సిడెంట్ తర్వాతి నుంచే.. కారులో కదలికలు, ఒకరు దుర్మరణం
యాక్సిడెంట్ జరిగిన స్థలం నుంచి కారును తొలగించి ట్రక్కులోకి ఎక్కించారు. అయితే, ట్రక్కులో ఉన్న కారు.. ఒక్కసారిగా వెనక్కి వెళ్లి అందులో ఉన్న ఓ మెకానిక్ కాళ్ల మీదకు ఎక్కింది. ట్రక్కు ఏటవాలుగా ఉండటం వల్ల అలా జరిగి ఉండవచ్చని భావించారు. ఈ కారును విడిభాగాలు విక్రయించే బ్యారీస్ అనే వ్యక్తి కొనుగోలు చేశాడు. బ్యారిస్ వద్ద ఇంజిన్ కొనుగోలు చేసిన ట్రాయ్ మెక్హెన్రీ తన స్నేహితుడు విలియం ఎస్రీచ్ కారుతో పోటీ పడుతూ ప్రమాదానికి గురయ్యాడు. మెక్ హెన్నీ కారుపై పట్టుకోల్పోయి చెట్టును ఢీకొని చనిపోయాడు. ఆ కారుతో పోటీపడిన విలియం కారు సైతం అదుపుతప్పింది. కానీ, విలియం ప్రాణాలతో బయటపడ్డాడు.
దొంగలకూ చుక్కలు చూపించిన కారు విడి భాగాలు
ప్రమాదం తర్వాత డీన్ కారు టైర్లు చెక్కు చెదరలేదు. వాటిని బ్యారీస్ మరో వ్యక్తికి విక్రయించాడు. ఆ వ్యక్తి కూడా రోడ్డు ప్రమాదానికి గురయ్యాడు. అయితే, ప్రాణాలతో తప్పించుకున్నాడు. ఈ వరుస ఘటనల తర్వాత బ్యారీస్ కారులోని మిగతా భాగాలను తన వద్దే ఉంచుకున్నాడు. ఎవరికీ అమ్మకూడదని భావించాడు. ఓ రోజు అతడి గ్యారేజ్లోకి చొరబడిన ఇద్దరు దొంగలు ఆ కారు స్టీరింగ్ వీల్, సీట్లను దొంగిలించబోయి గాయపడ్డారు. ఈ ఘటన తర్వాత బ్యారీస్ ఆ కారును కొద్ది రోజులు గ్యారీజీలో జాగ్రత్తగా దాచి పెట్టాలని, హైవే సేఫ్టీ ఎగ్జిబిషన్కు తరలించాలని నిర్ణయించుకున్నాడు.
గ్యారేజీలో అగ్నిప్రమాదం.. కారు సేఫ్
కారును ఎగ్జిబిషన్కు తరలించాలని భావించిన కొద్ది రోజుల్లోనే ఆ గ్యారీజీలో అగ్నిప్రమాదం చోటుచేసుకుంది. చిత్రం ఏమిటంటే.. ఆ ప్రమాదంలో కారుకు ఎలాంటి నష్టం వాటిల్లలేదు. దీంతో బ్యారీస్కు దిమ్మ తిరిగింది. ఇక ఆలస్యం చేయకుండా ఆ కారును వదిలించుకోవాలని బ్యారీస్ భావించాడు.
స్కూల్ ఎగ్జిబిషన్లో ప్రదర్శన.. విద్యార్థికి గాయాలు
ప్రమాదం తర్వాత ఆ కారును స్థానిక హైస్కూల్లో రోడ్డు ప్రమాదాలపై అవగాహన కలిగించే ఎగ్జిబిషన్కు తరలించారు. విద్యార్థులంతా ప్రమాదానికి గురైన కార్లను చూస్తుండగా ఊహించని ఘటన చోటుచేసుకుంది. ‘లిటిల్ బాస్టర్డ్’ కారు ఓ విద్యార్థి మీద పడింది. దీంతో ఆ విద్యార్థికి పక్కటెముకలు విరిగాయి.
ట్రక్కులో తరలిస్తుండగా ప్రమాదం.. డ్రైవర్ మృతి
డీన్ కారును ట్రక్కులో పెట్టి హైవే ఎగ్జిబిషన్కు తరలిస్తుండగా ఘోర ప్రమాదం చోటుచేసుకుంది. ఆ కారును తీసుకెళ్తున్న ట్రక్కు బోల్తాపడింది. ఈ ప్రమాదంలో ట్రక్కు నుంచి కిందపడిన డ్రైవర్ మీద డీన్ కారు పడింది. అనంతరం అది ఫ్రీవేలో వెళ్తున్న మరో రెండు ట్రక్కుల మీద పడింది. ఆ తర్వాత కారు అదృశ్యమైంది. అప్పటి నుంచి జేమ్స్ డీన్ మరణం, కారు మిస్సింగ్ ఘటనలు మిస్టరీగానే మిగిలిపోయాయి.
2005 ప్రకటనతో మరోసారి చర్చ..
ఈ కారు ఎవరికి కనిపించినా లేదా ఎవరైనా వినియోగిస్తున్నట్లు సమాచారం అందినా తమకు తెలపాలని ఇల్లినాసిస్లోని వోలో ఆటో మ్యూజియం ప్రకటించింది. కారు ఆచూకీ చెప్పినవారికి ఒక మిలియన్ డాలర్లు (రూ.7,48,76,000) చెల్లిస్తామని తెలిపింది. కానీ, ఆ కారు ఇప్పటికీ ఆ కారు గురించి సమాచారం లేదు. ప్రమాదం తర్వాత ఆ కారును ఎవరైనా ఎత్తుకెళ్లారా? మాయమైందా అనేది ఇప్పటికీ తెలియరాలేదు. మరోవైపు.. ఈ కారు ప్రమాదంతో సంబంధం ఉన్న డీన్ మెకానిక్ రోల్ఫ్ పరిస్థితి దయనీయంగా మారింది.
రెండుసార్లు ఆత్మహత్యాయత్నం.. చివరికి భార్యను కత్తితో పొడిచి..
ప్రమాదం జరిగిన రోజు డీన్తోపాటు ప్రయాణించిన రోల్ఫ్ మానసిక రోగిగా మారిపోయాడు. 1960లో ఒకసారి, 1967 మరోసారి ఆత్మహత్యాయత్నం చేశాడు. తాను చనిపోయే ప్రయత్నంలో భార్యను 14 సార్లు కత్తితో పోడిచాడు. లక్కీగా ఆమె ప్రాణాలకు ఏమీ కాలేదు. అయితే, రోల్ఫ్ 1981లో మద్యం తాగి వాహనాన్ని నడుపుతూ రోడ్డు ప్రమాదంలో చనిపోయాడు. అదే ఏడాది.. డీన్ కారును ఢీకొట్టిన తుర్నూసీడ్ లంగ్ క్యాన్సర్తో చనిపోవడం గమనార్హం.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.