అతను లేకనే బెంగళూరుకి పరాజయాలు

ఐపీఎల్ పదో సీజన్‌కి గాయం కారణంగా కేఎల్ రాహుల్ లేకపోవడంతోనే రాయల్ ఛాలెంజర్స్ బెంగళూరు వరుస పరాజయాలు చవిచూసిందని ఆస్ట్రేలియా మాజీ కెప్టెన్ రికీ పాంటింగ్ అభిప్రాయపడ్డాడు. తాజా సీజన్‌లో ఇప్పటి వరకు 13 మ్యాచ్‌లు పూర్తి చేసుకున్న బెంగళూరు కేవలం రెండింట్లో గెలుపొంది పాయంట్ల పట్టికలో చివరి స్థానానికి పరిమితమైంది. గత సీజన్‌లో మెరుగైన బ్యాటింగ్‌తో టాప్ స్కోరర్‌గా నిలిచిన విరాట్ కోహ్లితో పాటు ఏబీ డివిలియర్స్ ఆరంభంలోనే కొన్ని మ్యాచ్‌లకి దూరమవడం కూడా ఆ జట్టును దెబ్బతీసిందని పాంటింగ్ వివరించాడు.

‘బెంగళూరు జట్టులో కేఎల్ రాహుల్ లేని లోటుని ఎవరూ భర్తీ చేయలేకపోయారు. గత సీజన్‌లో అతను టాప్ ఆర్డర్‌కి వెన్నెముకలా నిలిచి అలవోకగా మ్యాచ్‌లను మలుపు తిప్పాడు. తాజా సీజన్‌లో అతను లేని లోటు స్పష్టంగా కనబడింది. క్రిస్‌గేల్, కోహ్లి, ఏబీ డివిలియర్స్, వాట్సన్ అంచనాలను అందుకోవడంలో తీవ్రంగా విఫలమయ్యారు. ముఖ్యంగా గత ఏడాదితో పోలిస్తే కెప్టెన్ విరాట్ కోహ్లి మెరుపులు ఈ సారి ఏమీ కనిపించలేదు’ అని పాంటింగ్ పెదవి విరిచాడు. బెంగళూరు టోర్నీలో తన చివరి మ్యాచ్‌ను ఢిల్లీ డేర్‌డెవిల్స్‌తో ఆదివారం ఆడనుంది.