14 ఏళ్ల లోపు పిల్లలు భద్రంగా రోడ్డు దాటలేరట!

టీనేజ్‌లోపు పిల్లలకు ట్రాఫిక్ సమయంలో భద్రంగా రోడ్లు దాటేంత పరిపకత్వ ఉండదని అమెరికాలోని అయోవా యూనివర్సిటీ పరిశోధకులు చేపట్టిన అధ్యయనంలో తేలింది. 6 నుంచి 14 ఏళ్ల లోపు పిల్లలను ఎంపిక చేసుకుని వాస్తవికమైన వాతావరణాన్ని కల్పించి అనేకసార్లు రద్దీగా ఉండే రోడ్లను దాటమని పరిశోధకులు సూచించారు. గంటకు 40 కిలోమీటర్ల వేగంతో ప్రయాణించే వాహానాల మధ్య నుంచి రోడ్డు దాటాలని 6 నుంచి 14 ఏళ్లలోపు పిల్లలకు మార్గదర్శకం చేశారు. ఈ పిల్లలు రోడ్డు దాటుతుండగా వారి వేగాన్ని, నైపుణ్యాలను నమోదు చేశారు.

ఆరేళ్ల పిల్లల నుంచి అప్పుడే టీనేజ్‌లోకి అడుగుపెడుతోన్న వారు రద్దీ రోడ్లను దాటడానికి కష్టపడ్డారు. అంతేకాకుండా రోడ్డు దాటేప్పుడు ప్రమాదాల బారిన పడేవారిలో వీరి రేటు 8 శాతం ఎక్కువని తేలింది. కేవలం 14 ఏళ్ల పిల్లలు మాత్రమే రోడ్లును భద్రంగా దాటగలిగారు. 12 ఏళ్ల పిల్లలు ట్రాఫిక్‌లోని ఎక్కువ ఖాళీ ప్రదేశాలను ఎంపిక చేసుకుని రోడ్డును దాటడానికి ప్రయత్నించారు. కొంత మంది చిన్న పిల్లలు వయోజనుల మాదిరిగా వ్యవహరించినట్లు అయోవా యూనివర్సిటీకి చెందిన సైకలాజికల్ అండ్ బ్రెయిన్ సైన్సెస్ విభాగం ప్రొఫెసర్ జొడై ప్లమెర్ట్ పేర్కొన్నారు. రద్దీ రోడ్లపై ట్రాఫిక్‌ను నియంత్రాల్సిన విషయం దిశగా తమ అధ్యయనం సాగినట్లు ఆయన తెలిపారు.

రోడ్డు దాటే సమయంలో ఆరేళ్ల పిల్లలు 8 సార్లు, ఎనిమిదేళ్ల పిల్లలు 6 సార్లు, పదేళ్ల పిల్లలు 5 సార్లు, 12 ఏళ్ల పిల్లలు 2 సార్లు వాహనాల మధ్యలో చిక్కుకుపోయి ప్రమాదాల బారినపడ్డారు. వీళ్లు వాహన వేగం, వాటికి, తమకు మధ్య దూరం, రోడ్డు దాటేందుకు కావాల్సిన వేగాన్ని అంచనా వేయడంలో విఫలమయ్యారని గుర్తించారు. అదే 14 ఏళ్లు, ఆ పై వయసున్న పిల్లలు మాత్రం ఏమాత్రం తడబడలేదని, వాటి వేగం, దూరం, చేరుకోవాల్సిన లక్ష్య వేగాన్ని సరిగ్గా అంచనావేశారని వారు తెలియజేశారు. దీంతో 14 ఏళ్లు ఆపైబడ్డవారంతా ప్రమాదాలకు గురికాలేదని వారు వెల్లడించారు. కాబట్టి14 ఏళ్ల లోపు పిల్లలు రోడ్డు దాటలేరని, రోడ్డు దాటే సమయంలో వారిని పెద్దలు కనిపెట్టుకుని ఉండాలని సూచించారు. రద్దీ సమయంలో భద్రంగా రోడ్డును దాటడానికి తల్లిదండ్రులు కూడా పిల్లలకు అదనపు జాగ్రత్తలు సూచించాలని పేర్కొన్నారు.