చర్చలకు రెడీ.. తేదీ చెప్పండి: రైతు సంఘాల నేతలు

రాజ్యసభ వేదికగా ప్రధాని నరేంద్ర మోదీ ఇచ్చిన పిలుపునకు రైతు సంఘాల నేతలు స్పందించారు. ప్రభుత్వంతో చర్చలకు తాము సిద్ధంగా ఉన్నామని.. సమావేశాలకు తేదీ నిర్ణయించాలని అన్నారు. రాజ్యసభలో సోమవారం (ఫిబ్రవరి 8) రాష్ట్రపతి ప్రసంగానికి ధన్యవాదాలు తెలిపే తీర్మానంపై మాట్లాడుతూ ప్రధాని మోదీ.. రైతుల ఆందోళన గురించి ప్రస్తావించారు. రైతులు లేవనెత్తుతున్న అభ్యంతరాలను పరిష్కరించేందుకు తమ ప్రభుత్వం సిద్ధంగా ఉందని స్పష్టం చేశారు. రైతులు తమ ఆందోళన విరమించి చర్చలకు రావాలని పిలుపునిచ్చారు. పంటలకు ప్రకటించిన కనీస మద్దతు ధర ఎప్పటికీ కొనసాగుతుందని స్పష్టం చేశారు. ఈ నేపథ్యంలో రైతు సంఘాలు స్పందించాయి.

‘ప్రభుత్వంతో చర్చలను మేం ఎప్పుడూ తిరస్కరించలేదు. ప్రభుత్వం ఎప్పుడు పిలిచినా మేం వెళ్లి సంప్రదింపులు జరిపాం. ఇప్పుడు కూడా చర్చలకు మేం సిద్ధంగా ఉన్నాం. తదుపరి భేటీకి తేదీ, సమయం ప్రభుత్వమే నిర్ణయించాలి’ అని సంయుక్త కిసాన్‌ మోర్చా సీనియర్‌ సభ్యులు, రైతు నేత శివకుమార్‌ కక్కా మీడియాతో అన్నారు.

కేంద్రంతో చర్చలకు తాము ఎప్పుడూ సిద్ధమేనని.. అయితే, ప్రభుత్వం నుంచి అధికారిక ఆహ్వానం రావాలని మరో నాయకుడు అభిమన్యు కోహర్‌ అన్నారు. ‘కనీస మద్దతు ధరలో మార్పుండదని ప్రభుత్వం చెబుతోంది. మరి అలాంటప్పుడు దానిపై చట్టబద్ధమైన హామీ ఎందుకు ఇవ్వలేకపోతోంది?’ అని ఆయన ప్రశ్నించారు.

వ్యవసాయ చట్టాలపై రైతు సంఘాల నాయకులు, ప్రభుత్వం మధ్య ఇప్పటివరకు 11 సార్లు చర్చలు జరిగాయి. కానీ, ఎలాంటి పురోగతి లేదు. చట్టాల అమలును ఏడాదిన్నర వరకు నిలిపివేస్తామని, రైతుల అభ్యంతరాలకు అనుగుణంగా సవరణలు చేస్తామని కేంద్రం చివరిసారిగా జరిగిన చర్చల్లో హామీ ఇచ్చింది. ఇంతకంటే ఉత్తమమైన ప్రత్యామ్నాయం లేదని వ్యవసాయ మంత్రి నరేంద్ర సింగ్ తోమర్ అన్నారు. అయితే.. ఈ ప్రతిపాదనలను రైతు సంఘాల నాయకులు తిరస్కరించారు. వ్యవసాయ చట్టాలను రద్దు చేస్తేనే ఆందోళన విరమించి ఇళ్లకు తిరిగి వెళ్తామని స్పష్టం చేశారు.