ఇకపై ఆ ఫైల్స్‌ను జీమెయిల్‌లో పంపలేరు!

ప్రపంచ వ్యాప్తంగా ఉన్న కొన్ని మిలియన్ల జీమెయిల్ యూజర్లు ఫిబ్రవరి 13వ తేదీ నుంచి ‘.js’ ఫైల్స్‌ను అటాచ్ చేసిన మెయిల్స్‌ను పంపలేరు. ఈ మేరకు జీమెయిల్‌లో .js ఫైల్స్ అటాచ్‌మెంట్‌ను నిషేధిస్తున్నట్లు జీ ష్యూట్ అప్‌డేట్స్ బ్లాగ్‌లో గూగుల్ ప్రకటించింది. ఈ .js ఫైల్స్ ద్వారా మాల్‌వేర్ విపరీతంగా పెరిగిపోవడంతో వీటిని జీమెయిల్‌కు అటాచ్ కాకుండా చర్యలు తీసుకున్నట్లు వివరించింది.

.js అనేది జావా స్క్రిప్ట్ సోర్స్ కోడ్ ఎక్స్‌టెన్షన్. భద్రతా కారణాల దృష్ట్యా జీమెయిల్ ఇప్పటికే చాలా ఫైల్స్ అటాచ్‌మెంట్‌పై ఆంక్షలు విధించింది. ఉదాహరణకు .exe, .msc, .bat వంటి ఫైల్స్ ఇప్పటికే జీమెయిల్‌కు అటాచ్ కావడంలేదు. తాజాగా .jsపై కూడా ఫిబ్రవరి 13 నుంచి జీమెయిల్ ఆంక్షలు విధించింది. గూగుల్ చెప్పిన తేదీ తరవాత ఒకవేళ మీరు ఆ ఫైల్స్‌ను అటాచ్ చేసిన ఆ ఫైల్స్ అటాచ్ కావని మీకు వార్నింగ్ వస్తుంది. కచ్చితంగా ఈ .js ఫైల్స్‌ను పంపాల్సిన అవసరం ఉంటే జీమెయిల్ మినహా మిగిలన గూగుల్ సర్వీసులు గూగుల్ డ్రైవ్, గూగుల్ క్లౌడ్ స్టోరేజ్ లేదా ఇతర స్టోరేజ్ సొల్యూషన్స్‌ను వాడుకోవచ్చని సలహా ఇచ్చింది.

కాగా, ప్రస్తుతం జీమెయిల్ కింది తెలిపిన ఫైల్ ఫార్మాట్లపై ఆంక్షలు విధించింది. అవి..
.ade, .adp, .bat, .chm, .cmd, .com, .cpl, .exe, .hta, .ins, .isp, .jar, .jse, .lib, .lnk, .mde, .msc, .msp, .mst, .pif, .scr, .sct, .shb, .sys, .vb, .vbe, .vbs, .vxd, .wsc, .wsf, .wsh.